वृत्तसंस्था, मॉस्को : युक्रेनसोबतचा तणाव अधिक वाढण्याची शक्यता लक्षात घेत सर्व प्रकारच्या हल्ल्यांना तोंड देण्याची तयारी रशियाने सुरू केली आहे. याच तयारीचा एक भाग म्हणून रशियाचे राष्ट्राध्यक्ष ब्लादिमीर पुतिन यांनी उत्तर प्लेसेत्स्क प्रक्षेपण स्थळावर सुरू असलेल्या आण्विक युद्ध दलाच्या सरावाचे बुधवारी निरीक्षण केले. क्रेमलिनने पुतिन यांच्या या दौऱ्याबाबत माहिती दिली. युक्रेनकडून रशियावर आण्विक हल्ला झाल्यास त्याला 'तितक्याच मोठ्या प्रमाणात' प्रत्युत्तर देण्यासाठी हा सराव केला जात असल्याचे रशियाचे संरक्षण मंत्री सर्गेई शोईगू यांनी पुतिन यांना सांगितले. 'रशियावर हल्ला झाल्यास त्याला तशाच पद्धतीने उत्तर देण्यासाठी 'शक्य ती सर्व पावले' उचलण्यासाठी तयार राहा,' असे वक्तव्य पुतिन यांनी संरक्षण दलांना संबोधित करताना नुकतेच केले होते. त्या पार्श्वभूीमवर पुतिन यांनी बुधवारी केलेल्या दौऱ्याला महत्त्व प्राप्त झाले आहे. या सरावादरम्यान 'यार्स' या आंतरखंडीय बॅलेस्टिक क्षेपणास्त्राची यशस्वी चाचणी घेण्यात आली. रशियाच्या एका पाणबुडीने बॅरेट्स समुद्रातून पूर्व कमचातका बेटावरील फायरिंग रेंजवर या आंतराष्ट्रीय क्षेपणास्त्राने यशस्वी निशाणा साधला. युक्रेनकडून मोठ्या प्रमाणात किरणोत्सर्ग करण्याची क्षमता असलेल्या 'डर्टी बॉम्ब'चा वापर केला जात असल्याचा आरोप रशियाने केला होता. व्लादिमीर पुतिन यांनी बुधवारी पुन्हा एकदा 'डर्टी बॉम्ब'चा उल्लेख केल्याने रशिया युक्रेनवर मोठा हल्ला करण्याच्या तयारीत असल्याचे संरक्षणतज्ज्ञांचे म्हणणे आहे. तर 'डर्टी बॉम्ब्'च्या नावाने रशिया खोटे 'फ्लॅग ऑपरेशन' राबविण्याचा प्रयत्न करीत असल्याचा आरोप युक्रेनने केला आहे. प्रतिकारासाठी 'नाटो'ही सज्ज रशियाच्या या युद्ध सरावाला उत्तर देण्यासाठी 'नाटो' देशांनीसुद्धा उत्तर-पश्चिम युरोपमध्ये आण्विक युद्धाचा वार्षिक सराव सुरू केला आहे. 'स्टेडफास्ट नून' या नावाने हा सराव केला जात आहे. या सरावादरम्यान दूर अंतरापर्यंत मारा करू शकणारे अमेरिकेचे बी-५२ आणि अण्वस्त्रे वाहून नेण्याची क्षमात असणाऱ्या लढाऊ विमानांसह ६० विमाने सहभागी झाली आहेत.
