अहमदाबाद : जागतिक ज्युनियर जगज्जेता नेमबाज रुद्रांश पाटीलने शुक्रवारी राष्ट्रीय क्रीडा स्पर्धेत सुवर्णपदकाची कमाई केली. दहा मीटर एअर रायफलच्या प्राथमिक फेरीत तिसरे, एलिमिनेशन राउंडमध्ये दुसरे आणि अंतिम लढतीत विजय अशी कामगिरी रुद्रांशने उंचावली आणि या स्पर्धेतील महाराष्ट्राचे पहिले सुवर्णपदक जिंकण्यात यश मिळवले. पुरुषांच्या दहा मीटर एअर रायफलच्या सुवर्णपदकाच्या लढतीत ठाण्याच्या रुद्रांशने पंजाबच्या अरुण बबुताला १७-७ असे पराभूत करून सुवर्णयश मिळवले. त्याचे हे राष्ट्रीय स्पर्धांच्या वरिष्ठ गटातील पहिलेच सुवर्णपदक आहे. गतवर्षी त्याला भोपाळला झालेल्या राष्ट्रीय नेमबाजी स्पर्धेत रौप्यपदकावर समाधान मानावे लागले होते. त्याने यापेक्षा सरस कामगिरी केली. वाचा- सुवर्णपदकाच्या लढतीत रुद्रांशने वर्चस्व राखले असले, तरी पात्रता फेरीत आणि एलिमिनेशन फेरीत रुद्रांशचा कस लागला. रुद्रांश पात्रता फेरीत ६३०.७ गुणांसह तिसरा होता. खानपूर येथील रायफल क्लबमध्ये शुक्रवारी सकाळी एलिमिनेशन राउंड झाली. रुद्रांशने २६२.७ गुणांसह दुसरा क्रमांक मिळवताना ऑलिम्पिकचा अनुभव असलेल्या ऐश्वर्य प्रताप तोमरला (२६१.८) मागे टाकले. ऐश्वर्यला अखेर ब्राँझ पदकावर समाधान मानावे लागले. एलिमिनेशन राउंडमध्ये अव्वल आलेल्या बबुताविरुद्ध रुद्रांशने निर्णायक लढतीत वर्चस्व राखले. वाचा- अठरा वर्षीय रुद्रांशने २०१६ पासून नेमबाजीला सुरुवात केली. तो सुरुवातीला फुटबॉल आणि बुद्धिबळ खेळत होता. ठाण्यातील शूटिंग रेंजच्या उद्घाटनाच्यावेळी तो वडिलांसह गेला होता. त्या वेळी तेथील प्रशिक्षक स्नेहल कदम यांनी रुद्रांशला नेमबाजीच्या सरावासाठी पाठवण्याची विनंती केली. हौस म्हणून सुरुवातीला वडिलांनी त्याला नेमबाजीसाठी जाण्यास सांगितले. रुद्रांशने अल्पावधीतच मोठी झेप घेतली. त्याने शालेय स्पर्धेत जिल्हा, राज्य, विभागीय आणि राष्ट्रीय स्पर्धेत सुवर्णयश मिळवले. रुद्रांशने नियमितपणे सराव केला. सुरुवातीला तो सरावासाठी विलेपार्ले येथे जात असे. सध्या तो अजित पाटील यांच्याकडे चार वर्षांपासून ठाण्यात सराव करतो. पहाटे पाच वाजता त्याचा दिवस सुरू होता. यात शारीरिक मानसिक तंदुरुस्तीबरोबरच त्याला कॉलेज, अभ्यास, सराव सारे बघावे लागते, असे रुद्रांशचे वडिल बाळासाहेब पाटील यांनी सांगितले. दृष्टिक्षेप... - कैरो येथील जागतिक स्पर्धेसाठी रुद्रांशची भारतीय संघात निवड - बीए करीत असलेल्या रुद्रांशचे २०१९च्या आशियाई स्पर्धेत वैयक्तिक आणि सांघिकमध्ये सुवर्ण - २०२०च्या इजिप्तच्या पिरॅमिड आंतरराष्ट्रीय ऑनलाइन स्पर्धेत सुवर्णपदक - २०२१मध्ये पेरू येथे झालेल्या जागतिक ज्युनियर स्पर्धेत रौप्यपदक - २०२२ च्या ज्युनियर वर्ल्ड कप स्पर्धेत वैयक्तिक आणि सांघिकमध्ये सुवर्णपदक. ही स्पर्धा जर्मनीत - अझरबैझानमधील वरिष्ठांच्या वर्ल्ड कप स्पर्धेत सातवा
