मुंबई : कोल्हापूरच्या शाही दसरा महोत्सवात आता शासकीय सहभाग असणार आहे. त्यासाठी शाही दसरा महोत्सवास राज्य महोत्सवाचा दर्जा देण्याचा निर्णय घेण्यात आला असून, आज बुधवारच्या मेळाव्यासाठी जिल्हा नियोजन निधीतून २५ लाख रुपयांचा निधी देण्यात येणार असल्याची माहिती कोल्हापूरचे पालकमंत्री दीपक केसरकर यांनी मंगळवारी दिली. कोल्हापूर दसरा मेळाव्याला पुढील वर्षी एक कोटी रुपये देण्याचा निर्णय मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी घेतला आहे. या माध्यमातून कोल्हापूरला जागतिक पातळीवर नेण्याचा प्रयत्न आहे. कोल्हापूरचा शाही दसरा पूर्वापार प्रसिद्ध आहे. कोल्हापूरची संस्कृती समृद्ध आहे. शाहू महाराजांचा मोठा वारसा आहे. त्याचसोबत महालक्ष्मीचे मंदिर, कुस्ती, मैदानी खेळ, कोल्हापूरची खाद्यसंस्कृती आदी घटक देशभरातील पर्यटकांना आकर्षित करणारे आहेत, असे केसरकर म्हणाले. छत्रपती उदयनराजे भोसले यांच्याशी चर्चा करून, सातारा येथेही अशाच प्रकारे उत्सव साजरा करण्याचा प्रयत्न करण्यात येणार असल्याचेही केसरकर यांनी सांगितले.
