पिंपरी: पुण्याचे पालकमंत्री तथा उच्च व तंत्र शिक्षण मंत्री चंद्रकात पाटील यांच्यावर पिंपरी-चिंचवड दौऱ्यादरम्यान एका व्यक्तीने शाईफेक केली. पोलिसांनी त्या व्यक्तीला जागेवरच पकडून ताब्यात घेतले. त्याच्या काही साथीदारांना देखील ताब्यात घेतले असून त्यांच्यावर गुन्हा दखल करण्यात आला आहे. या घटनेने पिंपरी चिंचवड.परिसरात काही वेळ तणावाचे वातावरण निर्माण झाले होते. आमच्या दैवतांबदल काही बोलणार असेल तर ते आम्ही कदापि सहन करणार नाही, अशी आक्रमक अशी प्रतिक्रिया येथील पदाधिकारी आणि कार्यकर्त्यांनी दिली आहे. मनोज भास्कर घरबडे, (वय ३४ रा. गोकुळ हॉटल जवळ पिंपरी, समता सैनिक दल संघटक ), धनंजय भाऊसाहेब इजगज (वय २९ वर्षे रा. आनंदनगर चिंचवड पुणे,समता सैनिक दल सदस्य) , विजय धर्मा ओव्हळ (वय ४० वर्षे रा. आनंदनगर चिचवड पुणे, वंचित बहुजन आघाडी सचिव) यांना पोलिसांनी ताब्यात घेतले असून त्यांच्यावर गुन्हा दखल करण्यात आला आहे. या घटनेने चिंचवड पोलिस स्टेशन येथे भाजपचे कार्यकर्ते आणि समता सैनिक दल आणि अन्य संघटना समोरासमोर आल्याचे पहायला मिळाले. चंद्रकांत पाटील यांनी पैठण येथे झालेल्या एका कार्यक्रमात कर्मवीर भाऊराव पाटील, डॉ. बाबासाहेब आंबेडकर, महात्मा ज्योतिबा फुले यांच्याबाबत आक्षेपार्ह आणि संतपाजनक विधान केले होते. त्याचे पडसाद संपूर्ण राज्यभर उमटले असून त्याचाच परिणाम म्हणजे हल्ला होता. या घटनेमुळे अनेक संघटना आक्रमक झाल्या असून महापुरुषांबद्दल असे वक्तव्य कदापि सहन केले जाणार नाही, असा संदेश या संघटनांकडून देण्यात आला. पोलिसांनी पकडल्यानंतर या कार्यकत्यांनी कर्मवीर भाऊराव पाटील, महात्मा फुले आणि डॉ. बाबासाहेब आंबेडकर याचा विजय असो अशा घोषणा दिल्या. चंद्रकांत पाटील पिंपरी चिंचवडचे माजी नगरसेवक मोरेश्वर शेडगे यांच्या निवासस्थानी सदिच्छा भेट देऊन निघाले असताना हा प्रकार घडला आहे. त्यामुळे चंद्रकात पाटील आक्रमक झाले होते. हिम्मत असेल तर समोर येऊन बोला, मी कुणाला घाबरत नसल्याची प्रतिक्रिया त्यांनी दिली. या प्रकरणाचा अधिक तपास चिंचवड पोलिस करत आहेत.
