मुंबई : पंतप्रधान नरेंद्र मोदी यांच्या बीकेसी येथील सभास्थळी राखीव ठेवण्यात आलेल्या व्हीव्हीआयपी कक्षात घुसखोरी करणाऱ्या रामेश्वर मिश्रा या तरुणाला वांद्रे-कुर्ला कॉम्प्लेक्स पोलिसांनी अटक केली आहे. एनएसजी कमांडो असल्याचे ओळखपत्र दाखवून आतमध्ये शिरत असताना रामेश्वरची धरपकड करण्यात आली. नवी मुंबईत राहणारा रामेश्वर सन २०१९पर्यंत एनएसजीमध्ये कार्यरत असल्याचे सांगत आहे. न्यायालयाने त्याला २५ जानेवारीपर्यंत पोलिस कोठडी सुनावली आहे. दरम्यान त्याने हे कृत्य नेमके कशासाठी केले, याबाबत अद्याप काहीच स्पष्ट झाले नाही.वांद्रे-कुर्ला कॉम्प्लेक्स येथील एमएमआरडीए मैदानावर गुरुवारी पंतप्रधान नरेंद्र मोदी यांची सभा आयोजित करण्यात आली होती. या ठिकाणी कोणतीही अनुचित घटना घडू नये यासाठी मुंबई पोलिसांनी कडक बंदोबस्त ठेवला होता. गुन्हे शाखा युनिट २चे जयेश कुलकर्णी, सहाय्यक आयुक्त चंद्रकांत जाधव, पोलिस निरीक्षक बाळासाहेब राऊत, उपनिरीक्षक पांडुरंग शिंदे, अविनाश वळवी यांच्यावर व्हीव्हीआयपी कक्ष सांभाळण्याची जबाबदारी होती. खासदार, मंत्री, आमदार यांना तपासून कक्षामध्ये सोडले जात होते. दुपारी तीनच्या सुमारास रामेश्वर मिश्रा व्हीव्हीआयपी कक्षाजवळ आला. त्याच्या गळ्यामध्ये पीएमओ कार्यालयाकडून दिली जाणारी सुरक्षा रिबिन असल्याने पोलिसांनी मिश्रा याला ओळखपत्र दाखविण्यास सांगितले. मात्र त्याने ओळखपत्र न दाखवता 'द गार्ड' या लष्कराच्या पठाणकोट येथील बटालियनचा नायक असल्याचे सांगितले. मिश्रा हा सन २०१६ ते २०१९पर्यंत एनएसजी सेवेत होता. तसेच त्याच्याकडे दिल्ली पोलिस पीएम सुरक्षा असलेली रिबिन आढळून आली. त्याबाबत पोलिसांनी मिश्राला विचारणा केली असता त्याने माहिती देण्यास नकार दिला. मिश्राने ओळखपत्रात खाडाखोड केली असून, ते ओळखपत्र बनावट असल्याचा पोलिसांना संशय आला.ओळखपत्रात खाडाखोडपोलिसांनी रामेश्वर मिश्रा याला ताब्यात घेऊन वांद्रे-कुर्ला कॉम्प्लेक्स पोलिस ठाण्यात आणले. बेकायदा प्रवेश आणि फसवणुकीच्या गुन्ह्याखाली अटक करून पोलिसांनी त्य़ाला न्यायालयात हजर केले. एनएसजीमध्ये काम केल्याचे मिश्रा सांगत असून २०१९पर्यंतचे त्याच्याकडे ओळखपत्र आहे. त्यामध्ये खाडाखोड करून त्याने २०२५पर्यंत मुदत वाढवली होती. असे करण्यामागे त्याचा नेमका उद्देश काय होता, याबाबत तो स्पष्ट काहीच सांगत नसल्याचे पोलिसांनी म्हटले आहे.
