मुंबई : मुंबईत फसवणूक करून तो फरार झाला. पोलिसांच्या तावडीत सापडू नये यासाठी त्याने मुंबई सोडली. स्वतःच्या पेहरावात बदल केला. नावामध्ये बदल करून तो ओळख लपवून राहू लागला. पण तोंडातील सोन्याचे दोन दात काढायला तो विसरला आणि त्या दातांमुळे पंधरा वर्षांने पुन्हा पोलिसांच्या जाळ्यात अडकला. फसवणुकीच्या गुन्ह्यातील आरोपीला रफी अहमद किडवाई मार्ग पोलिसांनी पंधरा वर्षांनंतर अटक केली.नेमकं प्रकरण काय?दादर जवळील हिंदमाता परिसरात ए. एच. गंगर हे कपडे विक्रीचा व्यवसाय करतात. प्रवीण आशुभा जडेजा हा त्यांच्या दुकानात सेल्समन म्हणून कामाला होता. यादरम्यान अन्य दुकानदारांकडून येणे असलेली रक्कम घेण्यासाठी गंगर यांनी प्रवीणला पाठविले. प्रवीणने दोन ते तीन दुकानदारांकडून ४० हजार रुपये जमा केले. मात्र सार्वजनिक शौचालयात लघवीसाठी गेला असताना कुणीतरी पैशाची पिशवी चोरल्याचे त्याने सांगितले. पैसे चोरी झाल्यामुळे गंगर यांनी त्याला पोलिसांत तक्रार करण्यास सांगितले. त्याच्या तक्रारीवरून रफी अहमद किडवाई मार्ग पोलिस ठाण्यात चोरीचा गुन्हा दाखल करण्यात आला. पोलिसांनी केलेल्या तपासामध्ये चोरी झाली नसून प्रवीण याने चोरीचा बनाव केल्याचे निदर्शनास आले. त्यामुळे पोलिसांनी फसवणुकीचा गुन्हा दाखल करून प्रवीणला अटक केली. या गुन्ह्यात जामीन मिळाल्यावर पसार झालेल्या प्रवीण पुन्हा न्यायालयात आलाच नाही.न्यायालयाने प्रवीण याला फरार आरोपी घोषित केल्यानंतर सहायक निरीक्षक महेश लामखडे यांच्यासह नारायण कदम, सुरेश कडलग, रवींद्र साबळे, विद्या यादव, सुशांत बनकर यांच्या पथकाने त्याचा शोध सुरु केला. प्रवीण याचा तात्पुरत्या स्वरूपातील पत्ता दुकानातील होता. त्याचा फोटो किंवा मूळ गाव असे काहीच माहित नव्हते. हिंदमाता परिसरातील दुकानदारांकडे, सेल्समनकडे, गुन्ह्यातील साक्षीदारांकडे अनेकदा चौकशी केली असता ठोस माहिती मिळत नव्हती मात्र त्याच्या वर्णनाबद्दल माहिती काढत असताना त्याचे दोन दात सोन्याचे असल्याची माहिती मिळाली.नावावरून तो गुजरातमधील असण्याची शक्यता असल्याने मिळत्या-जुळत्या व्यक्तींची तुलना करण्यात आली. त्यावेळी सोन्याचे दात असलेला प्रदीपसिंह नावाचा एक भाजी विक्रेता कच्छ जिल्हात असल्याचे समजले. पोलिसांनी त्याची माहिती काढून विम्याचे पैसे घेण्याच्या बहाण्याने त्याला मुंबईत बोलावले. प्रदीपसिंह हाच प्रवीण असल्याचे उघड होताच त्याला पुन्हा अटक करण्यात आली.
