ब्राझिलिया: अनेकदा डॉक्टर सूचना देऊनही लोक त्या सूचनांचं नीट पालक करत नाही. यामुळे अनेकदा त्यांना त्यांचा जीव गमवावा लागतो. असंच काहीसं या व्यक्तीसोबत घडलं आहे. ही व्यक्ती पेशाने वकील होती, ती चक्क बंदूक घेऊन एमआरआय स्कॅनिंग रूममध्ये पोहोचली. तिथे बंदुकीतून गोळीबार होऊन त्या व्यक्तीच्या पोटात गोळी लागल्याने त्याचा मृत्यू झाला आहे. ब्राझीलमधील साओ पाउलो येथील ४० वर्षीय वकील लिएंड्रो मॅथियास डी नोव्हस असे या व्यक्तीचे नाव आहे. १६ जानेवारीला तो आपल्या आईचे एमआयआर करण्यासाठी रुग्णालयात आला होता. स्कॅनिंग रूममध्ये जाण्यापूर्वी मेटलच्या सर्व वस्तू जमा करा, असं डॉक्टरांनी सांगितलं. तेव्हा तो आपल्याजवळ बंदूक असल्याचे हॉस्पिटलला सांगण्यास विसरला.इंडिपेंडंट यूकेच्या अहवालानुसार, एमआरआय स्कॅनरच्या चुंबकीय क्षेत्राने लिएंड्रोची बंदूक त्याच्या कंबरेवरून ओढून घेतला आणि त्यातून गोळी झाडली गेली. ही गोळी त्याच्या पोटात लागली. रुग्णालयात उपचारादरम्यान ६ फेब्रुवारी रोजी त्याचा मृत्यू झाला. वकील असूनही तो स्वत:जवळ बंदुक ठेवत होता. तसेच, तो टिकटॉक आणि इंस्टाग्राम अकाउंटवर त्याच्याशी संबंधित स्टोरीही पोस्ट करत असत. सोशल मीडियावर त्यांचे हजारो फॉलोअर्स आहेत. ब्राझीलच्या एका अधिकाऱ्याने सांगितले की, आम्ही वकील डॉ. लिएंड्रो मॅथियास डी नोव्हस यांच्या अकाली निधनाबद्दल खेद व्यक्त करतो. या शोकप्रसंगी आम्ही त्यांच्या कुटुंबीयांप्रती संवेदना व्यक्त करतो.रुग्णालयाने दिलेल्या माहितीनुसार, आमच्या टीमने सर्व अपघात प्रतिबंधक प्रोटोकॉलचे पालन केले आहे. जसे सर्व युनिट्सच्या बाबतीत आहे. रुग्ण आणि सोबत असलेली महिला दोघांनाही एमआरआय कक्षात जाण्यापूर्वी प्रक्रियेबद्दल योग्य सूचना देण्यात आल्या होत्या आणि धातूच्या वस्तू घेऊन जाऊ नयेत अशी ताकीदही देण्यात आली होती.लिएंड्रो आणि त्यांची आई दोघांनी प्रोटोकॉलशी संबंधित एका फॉर्मवर स्वाक्षरी केली. परंतु लिएंड्रोने बंदूकीबाबत सांगितलं नाही आणि ती घेऊन ते एमआरआय कक्षात गेले. त्यांच्याकडे असलेल्या शस्त्राची नोंदणी झालेली होती आणि वकिलाकडे वैध परवाना होता, असं पोलिसांनी सांगितलं आहे.
