नवी दिल्ली: भारत आणि ऑस्ट्रेलियामधील चौथा आणि अखेरचा कसोटी सामना शुक्रवारपासून खेळवला जात आहे. या सामन्यादरम्यानच एक वाईट बातमी समोर आली आहे. टीम ऑस्ट्रेलियाने ट्विट करत ही माहिती दिली. गेल्या २ कसोटी सामन्यांमध्ये पॅट कमिन्स हा अनुपस्थित होता. त्याच्या आईची तब्येत ठीक नसल्याने तो मायदेशी परतला होता. पण शुक्रवारीच पॅट कमिन्सच्या आईला देवाज्ञा झाली. कमिन्सची आई मारिया कॅन्सरने त्रस्त होती आणि त्यांच्यावर दीर्घकाळ उपचार सुरू होते. पॅट कमिन्सची आई मारिया यांच्या सन्मानार्थ ऑस्ट्रेलियन संघ आज 'ब्लॅक आर्म बँड' घालून खेळणार आहे. पॅट कमिन्सने भारत आणि ऑस्ट्रेलिया दरम्यान सुरू असलेल्या बॉर्डर-गावस्कर ट्रॉफी (BGT 2023) चे शेवटचे दोन कसोटी सामने सोडण्याचा आणि त्याच्या आईची काळजी घेण्यासाठी परत जाण्याचा निर्णय घेतला होता. क्रिकेट ऑस्ट्रेलियाने आपल्या ट्विटर हँडलवरून या वृत्ताला दुजोरा दिला आहे. क्रिकेट ऑस्ट्रेलियाने लिहिले की, “मारिया कमिन्स यांचे रात्री निधन झाल्याचे आम्हाला खूप दुःख आहे. क्रिकेट ऑस्ट्रेलियाच्या वतीने, आम्ही पॅट, कमिन्स कुटुंब आणि त्यांच्या मित्रपरिवारासाठी मनापासून शोक व्यक्त करतो. ऑस्ट्रेलियन पुरुष संघ आज आदराचे चिन्ह म्हणून ब्लॅक आर्म बँड घालून खेळेल."ऑस्ट्रेलियाचा कसोटी कर्णधार पॅट कमिन्सने घरी राहण्यासाठी आणि आजारी आईसोबत राहण्यासाठी भारताविरुद्धच्या उर्वरित दोन कसोटी सामन्यांमध्ये न खेळण्याचा निर्णय घेतला होता. "माझी आई आजारी असल्याने मी सध्या भारतात न परतण्याचा निर्णय घेतला आहे आणि मी तिची काळजी घेण्यासाठी आलो आहे," असे कमिन्सने एका निवेदनात म्हटले आहे.कमिन्सची आई ब्रेस्ट कॅन्सरशी झुंज देत होती पॅट कमिन्सच्या आईचे दीर्घकालीन आजाराने निधन झाले. २००५ मध्ये त्यांना पहिल्यांदा ब्रेस्ट कॅन्सर झाल्याचे समजले. गेल्या काही आठवड्यांपासून त्या एका गंभीर आजाराशी झुंज देत होत्या. बीसीसीआयनेही शोक व्यक्त केला, या कठीण काळात आमची प्रार्थना कमिन्स आणि त्यांच्या कुटुंबियांसोबत आहे.
