पुणे : पुण्यातील सहकार नगर येथील मुक्तांगण बालरंजन केंद्र येथे मनसे अध्यक्ष यांनी २८ डिसेंबर २०२२ रोजी सहजीवन व्याख्यानमालेत "नवं काहीतरी" या विषयावर व्याख्यान दिलं होतं. या व्याख्यानमालेत राज ठाकरे यांनी माझ्यासोबत काम करण्याची इच्छा असणाऱ्या तरुणांनी आयोजकांकडे नावे नोंदवावीत, असं आवाहन केलं होतं. राज ठाकरे यांच्या या आवाहनानंतर ५८ तरुणांनी आयोजकांकडे नाव नोंदवले होते. याची दखल घेत राज यांनी काल अचानक या तरुणांची बैठक घेत त्यांच्या प्रश्नांना उत्तरं दिली. पुण्यातील पर्वती येथील पंडित भीमसेन सभागृह येथे ही बैठक पार पडली. या बैठकीला पुण्यातील मनसेचे अनेक नेते उपस्थित होते. यामध्ये अनिल शिदोरे, राजेंद्र वागसकर, सरचिटणीस वसंत मोरे, किशोर शिंदे, पक्षाचे सचिव-प्रवक्ते योगेश खैरे, महाराष्ट्र उपाध्यक्ष गणेश सातपुते, बाळा शेडगे, पर्वती विभाग अध्यक्ष विक्रांत आमराळे, विद्यार्थी सेनेचे पुणे शहर अध्यक्ष अमोल शिंदे, जयराज लांडगे, संतोष पाटील आदी मनसेचे पुणे शहरातील प्रमुख पदाधिकारी उपस्थित होते. मात्र या बैठकीनंतर मनसेचे फायरब्रॅन्ड नेते वसंत मोरे यांची एक फेसबुक पोस्ट चांगलीच चर्चेत आहे. सहसा पक्षाच्या शहर नेतृत्वाच्या बैठकीला हजर न राहणारे वसंत मोरे राज ठाकरे पुण्यात आल्यावर मात्र सर्वात आधी हजर असतात. या बैठकीला देखील वसंत मोरे हजर होते. मंचावर न जाता सभागृहात शेवटच्या रांगेत वसंत मोरे बसले होते. मात्र वसंत मोरे दिसत नसल्याने राज ठाकरेंनी विचारणा करताच वसंत मोरे हे लगोलग राज ठाकरे यांच्या मागे मंचावर जाऊन बसले. यासंदर्भात वसंत मोरे यांनी फेसबुक पोस्ट केली आहे. वसंत मोरेंची फेसबुक पोस्ट जशीच्या तशी :"वेळ - सकाळी १०:०० ची ठिकाण - पंडित भीमसेन सभागृह पर्वती पुणे सभागृह निमंत्रितांमुळे फुल भरलेले असल्यामुळे मी सर्व पदाधिकाऱ्यांसह मागे बसलो होतो. कारण कार्यक्रम नागरिकांचा होता, त्यामुळे नागरिकांचे प्रश्न येत होते. साहेब त्यांना अपेक्षित उत्तरे देत होते आणि अचानकच साहेबांनी आवाज दिला आरे वसंत कुठे आहे रे? मी उभा राहिलो आणि पुढच्या काही मिनिटात मी साहेबांच्या मागे बसलो होतो. पुन्हा एकदा Where is Vasant More ? Here is Vasant More"
