पानिपत: हरियाणातील पानिपतमधून एक खळबळजनक घटना समोर आली आहे. रोहतक-जयपूर महामार्गावरील रेल्वे ओव्हर ब्रिज बायपासवर एका आढळल्याने खळबळ उडाली आहे. या महिलेच्या तोंडावर टेप लावण्यात आलेला होता, तर महिलेचे हात दोरीने बांधलेले होते. या भयंकर घटनेची माहिती परिसरातील नागरिकांनी तात्काळ पोलिसांना दिली. घटनेची माहिती मिळताच वरिष्ठ पोलीस अधिकारी घटनास्थळी पोहोचले. एफएसएल टीमलाही घटनास्थळी पाचारण करण्यात आले. त्यानंतर पोलिसांनी या घटनास्थळावरून आवश्यक पुरावे गोळा केले आहेत. याप्रकरणी पोलीस तपास करत आहेत.मिळालेल्या माहितीनुसार, मंगळवारी दुपारी बाराच्या सुमारास महामार्गावरून जाणाऱ्या लोकांची नजर एका सुटकेसवर पडली. जेव्हा लोकांनी ती सुटकेस उघडून पाहिली तेव्हा त्यांना धक्काच बसला. जेव्हा ही सुटकेस उघडली तेव्हा त्यात एका महिलेचा मृतदेह आढळून आला. या महिलेचा मृतदेह अत्यंत धक्कादायक परिस्थितीत आढळून आल्याने लोक घाबरले. या महिलेच्या तोंडावर टेप चिटकवण्यात आला होता तर तिचे हातही दोरीने बांधलेले होते.त्यानंतर त्यांनी तात्काळ पोलिसांना या घटनेची माहिती दिली. पोलिसांनी घटनास्थळी धाव घेऊन मृतदेह ताब्यात घेतला. सध्या या महिलेची ओळख पटवण्यात पोलिसांना यश आलेलं नाही. सुटकेसमधून कोणतीही कागदपत्रं सापडलेली नाहीत. तसेच, महिलेशी संबंधित कोणत्याही प्रकारचं ओळखपत्रही सापडलेलं नाही. त्यामुळे अद्याप पोलिसांना या महिलेची ओळख पटवता आलेली नाही.याप्रकरणी एएसपींनी सांगितले की, प्राथमिक तपासानुसार महिलेचं वय सुमारे ४५ वर्षे असल्याचे दिसते. या महिलेचे केस सोनेरी रंगाचे असून तिची ओळख पटवण्याचे प्रयत्न सुरू आहेत. एक-दोन दिवसांत महिला बेपत्ता झाल्याची तक्रार नोंदवली आहे का, याचा तपास सर्व पोलीस ठाण्यात सुरू आहे.मृतदेह पाहून असे दिसतं की ८ ते १० तासांपूर्वी महिलेची हत्या केल्यानंतर मृतदेह सुटकेसमध्ये बंद करून येथे टाकून देण्यात आला असावा. शवविच्छेदन अहवाल आल्यानंतरच मृत्यूचे खरे कारण समोर येईल, असे पोलिसांनी सांगितले. तसेच, याप्रकरणी तपास सुरु असून लवकरच याप्रकरणातील आरोपीला अटक करण्यात येईल असं पोलिसांनी सांगितलं.
