नवी दिल्ली : देशातील कोट्यवधी सामान्य वाहनचालकांच्या डोक्यावर पुन्हा एकदा महागाईची तलवार लटकली आहे. सौदी अरेबिया आणि तेल उत्पादक तसेच निर्यातदार देशांच्या संघटनेने तेल उत्पादनात कपात करण्याची घोषणा केली आहे, ज्याचा थेट परिणाम पेट्रोल आणि डिझेलच्या दरांवर होण्याची शक्यता आहे. देशभर दररोज सकाळी ६ वाजता सरकारी तेल विपणन कंपन्यांद्वारे वाहन इंधनाच्या दरात सुधारणा केली जाते. आंतरराष्ट्रीय बाजारात कच्च्या तेलाच्या आधारे किमती निश्चित केल्या जातात.क्रूड ऑइल महागलंआज आठवड्याच्या पहिल्या दिवशी म्हणजे सोमवारी कच्च्या तेलाच्या दरात कमालीची वाढ झाली आहे. या मागचे सर्वात मोठे कारण म्हणजे सौदी अरेबिया, इराणसह डझनहून अधिक तेल उत्पादक देशांनी मे महिन्यापासून तेल उत्पादन कमी करण्याचा निर्णय घेतला आहे. या निर्णयानंतरच कच्च्या तेलाच्या दरांनी लक्षणीय झेप घेतली आहे.क्रूड ऑइलच्या किमतींविषयी बोलायचे तर WTI कच्च्या तेलाच्या किमतींनी आज ६.२२ टक्क्यांची उडी घेत प्रति बॅरल $८०.३८ वर पोहोचले आहेत तर ब्रेंट क्रूड ऑइलच्या किमतीत ६.२२ टक्क्यांची मोठी उसळी नोंदवली गेली आणि ते प्रति बॅरल $८४.८६ वर व्यापार करत आहे. या वाढीनंतर आज भारतात पेट्रोल आणि डिझेलच्या दरात वाढ नोंदवली गेली का, हा सर्वात मोठा प्रश्न आहे.भारतातील पेट्रोल डिझेलची किंमतदिल्ली, मुंबई आणि कोलकाता या देशातील तीन प्रमुख महानगरांमध्ये आज वाहन इंधनाचे दर स्थिर राहिले असताना चेन्नईमध्ये पेट्रोल आणि डिझेल अनुक्रमे १० पैसे आणि ९ पैशांनी घसरून १०२.६३ रुपये आणि ९४.२४ रुपये प्रति लिटरने विकले जात आहे.पेट्रोल-डिझेल महागण्याची शक्यताआधीच दिवसेंदिवस वाढणाऱ्या महागाईने सामान्य नागरिकांचे कंबरडं मोडले असताना सौदी अरेबिया आणि OPEC प्लस देशांनी पुढील महिन्यापासून तेलाच्या उत्पादनात रोज १.१६ दशलक्ष बॅरलनी कपात करण्याची घोषणा केली आहे, ज्याचा थेट परिणाम पेट्रोल आणि डिझेलच्या दरांवर होण्याची शक्यता आहे. तेल आयात करणाऱ्या भारतासारख्या देशांना याचा मोठा फटका बसेल.देशातील तेल पुरवठा सुरळीत राहण्यासाठी केंद्र सरकारने देशातल्या रिफायनरींना तेल निर्यात न करण्याच्या सूचना केल्या असून या अधिसूचनेनुसार देशातल्या रिफायनरी त्यांच्या निर्यात कोट्यातील ५०% पेट्रोल आणि ३०% डिझेल देशात उपलब्ध करून देतील. याचा फटका खासगी रिफायनरींना बसणार आहे. खासगी रिफायनरी रशियाकडून कच्चं तेल स्वस्तात खरेदी करून ते देशात शुद्ध करून इतर देशात महागड्या दराने विकतात. मात्र, सध्या ओपेक देशांनी तेल उत्पादक कमी केलं तर त्याचा थेट परिणाम कच्चा तेलाच्या किंमतींवर होऊन तेलाचे दर पुन्हा भडकण्याची शक्यता आहे.
