म. टा. खास प्रतिनिधी, मुंबई : पवई येथे दाखल एका गुन्ह्याचा तपास करीत असताना सायबरचोरांना बँक खाती पुरविणारा एका खासगी बँकेचा विक्री अधिकारी पोलिसांच्या जाळ्यात अडकला आहे. पैशाच्या मोबदल्यात त्याने दीड हजारपेक्षा जास्त बँक खाती सायबरचोरांना दिल्याची माहिती समोर आली आहे. वेतन खाते उघडायच्या नावाखाली तो वेगवेगळ्या कंपन्यांच्या कर्मचाऱ्यांकडून कागदपत्रे घेऊन त्यांचा गैरवापर करीत होता.अशी आहे घटनापवई येथील एका तरुणाला गॅस एजन्सी सुरू करायची होती. याबाबत इंटरनेटवर शोध घेत असताना त्याच्या नजरेस एक वेबसाइट पडली. या तरुणाने त्याने या वेबसाइटवर माहिती अपलोड केली. काही दिवसांनी त्याला एक ई-मेल आला आणि निवड झाल्याचे कळविण्यात आले. त्याला आधारकार्ड, पॅनकार्ड देण्यास सांगितले. ही कागदपत्रे दिल्यानंतर वेगवेगळी कारणे सांगून या तरुणाकडून सहा लाख ८८ हजार रुपये उकळण्यात आले. अखेर फसवणूक झाल्याचे लक्षात आल्यावर या तरुणाने पवई पोलिस ठाण्यात तक्रार केली.पवई पोलिसांनी तांत्रिक पुराव्यांच्या आधारे तपास सुरू केला. मोबाइल क्रमांक आणि ज्या खात्यावर पैसे पाठविण्यात आली ती बँक खाती यावरून तपास करीत असताना पोलिसांना एका बँक खात्याची माहिती मिळाली. गुन्ह्यात वापरलेल्या बँक खात्याचे केवायसी पुण्यातील एका बँकेतून अपडेट झाल्याचे समोर आले. पोलिसांच्या पथकाने पुण्यामध्ये जाऊन चौकशी केली असता एका खासगी बँकेत विक्री अधिकारी असलेल्या एका तरुणाचा सहभाग आढळला. त्याला ताब्यात घेऊन चौकशी केली असता धक्कादायक माहिती समोर आली. हा तरुण कंपन्यांमध्ये जाऊन वेतन खाते उघडण्यासाठी तेथील कर्मचाऱ्यांकडून कागदपत्रे घेत असे. त्याआधारे बँक खाते उघडून, ते बिहारमधील सायबरचोराला विकत असल्याचे समजले.
