अहमदाबाद: सनरायझर्स हैदराबाद विरुद्ध गुजरात टायटन्सच्या सामन्यात शुभमनची बॅट चांगलीच तळपली आणि थेट शतक झळकावूनच थांबली. शुभमन गिलने या सामन्यात हैदराबादच्या अनेक गोलंदाजांना चांगलेच चोपले. या गोलंदाजांमध्ये त्याचा जिगरी दोस्त पण होता. त्याने त्यालाही सोडले नाही. शुभमन गिलने आपल्या या जिवाभावाच्या मित्राच्या गोलंदाजीवर दणदणीत षटकार लगावला. इतकेच नाही तर त्याने सामन्याआधी त्याच्या मित्राला सांगितले होते की मी षटकार मारणार. शतक झळकावल्यानंतर गिलने स्वतः याबद्दल माहिती दिली. क्रिकेटच्या मैदानावर अनेकदा भाऊ भावाची विकेट घेताना आणि षटकार मारताना पाहायला मिळते. या सामन्यात मित्र एकमेकांचे भाऊच असल्यासारखे असलेले शुभमन गिल आणि अभिषेक शर्मा एकमेकांच्या विरुद्ध खेळत होते आणि गिलने सामन्यापूर्वी जे मित्राला सांगितलं होतं ते करूनही दाखवलं. पाहूया काय म्हणाला गिल. सामन्यानंतर तो म्हणाला- मी SRH विरुद्ध आयपीएलमध्ये पदार्पण केले आणि त्यांच्याविरुद्ध माझे पहिले शतक झळकावले. म्हणूनच ते माझ्यासाठी अधिक खास आहे. मला आणखी बरेच काही करण्याची आशा आहे. मी माझ्या शेवटच्या खेळीकडे जास्त लक्ष देत नाही. नवीन सामन्यात नवीन सुरुवात करतो, हे आवश्यक आहे. अभिषेक शर्माविरुद्धचा षटकार माझ्यासाठी सर्वात आनंददायी होता. मी त्याला सांगितले होते की जर तू मला गोलंदाजी केलीस तर मी तुला षटकार मारणार. गिल आणि अभिषेक शर्मा देशांतर्गत क्रिकेटमध्ये पंजाब संघाकडून रणजी खेळतात. पंजाबसाठी टी-२० क्रिकेटमध्ये यांनी सलामीवीर म्हणून भूमिका पार पाडली आहे. एवढेच नाही तर हे दोघेही पृथ्वी शॉच्या नेतृत्वाखाली अंडर-१९ विश्वचषक विजेत्या संघाचे सदस्य होते. वैयक्तिक आयुष्यात दोघेही चांगले मित्र आहेत, पण जेव्हा क्रिकेटचा सामना येतो तेव्हा मैत्रीचे नाते बदलते. गिलने सुद्धा तेच केले. त्याने सामन्यात षटकार मारला, जो अभिषेक शर्माच्या १४व्या षटकात लगावला.अहमदाबादच्या नरेंद्र मोदी स्टेडियमवर शुभमन गिलने या मोसमात तीन अर्धशतक ठोकली होती. याच मैदानावर खेळल्या गेलेल्या शेवटच्या सामन्यात त्याचे शतक सहा धावांनी हुकले आणि तो ९४ धावांवर नाबाद राहून पॅव्हेलियनमध्ये परतला. सोमवारी सनरायझर्स हैदराबादविरुद्धच्या सामन्यात अखेर त्याला आयपीएलमधील पहिले शतक झळकावण्यात यश आले. गिलने १०१ धावांची दमदार खेळी खेळली. यादरम्यान त्याने ५८ चेंडूंचा सामना करताना १३ चौकार आणि १ षटकार मारला.
