म. टा. विशेष प्रतिनिधी, मुंबई : महाराष्ट्राच्या राजकारणात राजकीय भूकंप होणार... मोठ्या घडामोडी घडणार, अशा चर्चा गेले कित्येक दिवस सुरू असताना राष्ट्रवादी काँग्रेसचे राष्ट्रीय अध्यक्ष शरद पवार यांनी मंगळवारी टाकलेल्या एका अनपेक्षित राजकीय गुगलीने राज्यातील राजकीय मॅच पूर्णतः फिरली. आपण राष्ट्रवादी काँग्रेसच्या अध्यक्षपदाचा राजीनामा देणार आहोत, अशी घोषणा शरद पवार यांनी मंगळवारी दुपारी एका कार्यक्रमात केली आणि राष्ट्रवादीत हलकल्लोळ उडाला. संध्याकाळपर्यंत सुरू असलेल्या भेटीगाठी, बैठका, पवार यांच्या मनधरणीचे सातत्याचे प्रयत्न यानंतर, 'मला यावर विचार करायला दोन-तीन दिवस द्या', असे आवाहन पवार यांनी राष्ट्रवादीचे नेते, कार्यकर्ते यांना केले आणि हलकल्लोळ काहीसा शमला. वरकरणी काहीही दिसत असले तरी, याद्वारे, भारतीय जनता पक्षासोबत जाऊ इच्छिणाऱ्या, वेगळा विचार करू पाहणाऱ्या पक्षातील गटाची पुरती कोंडी पवार यांनी केल्याचे राजकीय निरीक्षकांचे म्हणणे आहे.राष्ट्रवादी काँग्रेसमध्ये सध्या जोरदार धमासान सुरू असल्याचे वृत्त सर्वप्रथम 'महाराष्ट्र टाइम्स'ने दिले होते. राष्ट्रवादीमध्ये मंगळवारी घडलेल्या घडामोडी, व पुढेही घडू पाहणारा घटनाक्रम त्यालाच धरून जाणारा असल्याचे स्पष्ट होत आहे. राष्ट्रवादीचे अध्यक्ष शरद पवार यांच्या 'लोक माझे सांगाती' या राजकीय आत्मचरित्राच्या सुधारित आवृत्तीचे प्रकाशन यशवंतराव चव्हाण प्रतिष्ठानमध्ये मंगळवारी झाले. प्रकाशनानंतर शरद पवार यांनी आपले मनोगत व्यक्त करताना, पक्षाध्यक्षपद आपण सोडणार आहोत... पक्षातील ज्येष्ठ नेत्यांच्या समितीने पुढचा अध्यक्ष निवडावा, अशी सूचना पवार यांनी उपस्थित नेते, पदाधिकारी, कार्यकर्ते यांच्यासमक्ष केली आणि सभागृहात हलकल्लोळच झाला. या सगळ्यांनी पवार यांना गराडाच घातला. पक्षाध्यक्षपद सोडण्याचा विचार सोडून द्या... तुमच्याशिवाय कुणीही पक्षाध्यक्ष नको, असे आर्जव ते करीत होते. अनेक नेत्यांना अश्रूही अनावर झाले होते. त्या परिस्थितीत पवार यांना तेथून हलणेही कठीण झाले. अखेर ज्येष्ठ नेत्यांनी साऱ्यांची कशीबशी समजूत काढली व पवार यांना तेथून निघता आले. तरीही, असंख्य कार्यकर्ते चव्हाण प्रतिष्ठानच्या बाहेर संध्याकाळपर्यंत ठिय्या मारून बसले होते. शरद पवार हे सिल्व्हर ओक निवासस्थानी गेल्यानंतर प्रफुल पटेल, अजित पवार, जयंत पाटील, छगन भुजबळ, दिलीप वळसे-पाटील, अनिल देशमुख, धनंजय मुंडे, हसन मुश्रीफ, राजेश टोपे, रोहित पवार, अशोक पवार, शेखर निकम आदी नेत्यांनी सिल्व्हर ओक निवासस्थानी जाऊन पवार यांची भेट घेतली. व नंतर पवार यांचा निरोप कार्यकर्त्यांना दिला. 'दोन-तीन दिवस द्या'कार्यकर्ते व नेत्यांच्या सततच्या आग्रहाच्या पार्श्वभूमीवर, आपल्याला देशातून, तसेच राज्यभरातून फोन येत आहेत; राजीनामाच्या निर्णयावर विचार करण्यासाठी आपल्याला दोन-तीन दिवस द्या, असे आवाहन पवार यांनी संध्याकाळी केले. त्यांचा हा निरोप आंदोलनकर्त्या कार्यकर्त्यांपर्यंत पोहोचवल्यानंतर आंदोलन मागे घेण्यात आले.पुढे काय होणार?नेतृत्वाच्या प्रश्नावर पवार यांनी त्यांच्या कुटुंबीयांशी चर्चा केली असून पक्षाच्या राष्ट्रीय अध्यक्षपदाची जवाबदारी सुप्रिया सुळे यांनी सांभाळावी, तसेच राज्यातील राजकीय निर्णयाची संपूर्ण जवाबदारी अजित पवार यांनी सांभाळावी असा तोडगा यातून निघाला असल्याचे राष्ट्रवादीतील काही ज्येष्ठ नेत्यांचे म्हणणे आहे. मात्र कार्यकर्त्यांच्या दबावापुढे जे ठरले तसेच घडेल, की काही वेगळे घडेल याची शाश्वती सध्या राष्ट्रवादीतील एकही नेता द्यायला तयार नाही.समितीत कोण?पुढील पक्षाध्यक्ष ठरवण्यासाठीच्या समितीत प्रफुल पटेल, सुनील तटकरे, के. के. शर्मा, पी. सी. चाको, अजित पवार, जयंत पाटील, सुप्रिया सुळे, छगन भुजबळ, दिलीप वळसे पाटील, अनिल देशमुख, राजेश टोपे, जितेंद्र आव्हाड, हसन मुश्रीफ, धनंजय मुंडे, जयदेव गायकवाड तसेच इतर सदस्य म्हणून महिला आघाडीच्या फौजिया खान, धीरज शर्मा, सोनिया दूहन आदी सदस्य असावेत, असे पवार यांनी सुचवले आहे.
