नागपूर: खेळताना जनरेटरच्या पट्ट्यात अड़कून गंभीर जखमी झालेल्या बालिकेवर शासकीय वैद्यकीय महाविद्यालयात आणि रुग्णालयात (मेडिकल) शस्त्रक्रिया करण्यात आली. सध्या या बालिकेची प्रकृती स्थिर आहे. नागपूर जवळील कमाठीच्या वैष्णवदेवी नगरात राहणारी ही बालिका दुपारच्या वेळी घराजवळच इतर सवंगड्यांसह खेळत होती. बाजुलाच जनरेटर सुरू होते. खेळता खेळता ती जनरेटरवर पडली. क्षणात तिचे केस त्यात अडकले आणि काही कळायच्या आत तिच्या डोक्यावरील त्चचाच बाहेर ओढली गेली. यात तिचे कान आणि डोळेही क्षतिग्रस्त झाले. या घटनेमुळे ती किंचाळताच आजुबाजूच्यांचे तिकडे लक्ष गेले. एकाने जनरेटर बंद करून तिला बाहेर ओढले. कवटीवरील पूर्ण त्वचा निघाल्याने दिसणारे दृश्य भयंकर होते. तिची ती अवस्था पाहून पालकांनी हंबरडा फोडला. आजुबाजूचे लोकही मदतीला धावले. क्षणात तेथे मोठी गर्दी जमा झाली. त्यानंतर रक्तबंबाळ अवस्थेत तिला मेडिकलमध्ये आणण्यात आवले. त्वचा निघालेल्या भागातून सतत रक्तस्राव सुरू होता. तिला तातडीने ट्रामा केअर युनिटमध्ये दाखल करण्यात आले. त्यानंतर तिच्यावर शस्त्रक्रिया करण्यात आली. तिच्या चेहऱ्याची अवस्था पाहून त्या उपचारांसाठी लगेच प्लॅस्टिक सर्जनलाही पाचारण करण्यात आले. या बालिकेवर तातडीने उपचार सुरू करण्यात आले. त्यामुळे सध्या तिची प्रकृती स्थिर आहे. तिला मेडिकलमध्ये आणताच डॉक्टर तसेच परिचारिका यांनी क्षणाचाही विलंब न लावता उपचार सुरू केले आहे. तसेच तिचा रक्तदाब आणि ऑक्सिजन पातळीही सामान्य असल्याची माहिती मेडिकलचे वैद्यकीय अधीक्षक डॉ. अविनाश गावंडे यांनी मटाला दिली.
