सोलापूर: दक्षिण सोलापूर तालुक्यातील मुस्ती गावात अवकाळी पावसामुळे एका आठ वर्षीय चिमुरडीचा मृत्यू झाला आहे. गच्चीवर खेळत असलेल्या लावण्या हनुमंत माशाळे (८) हिच्या अंगावर वीज कोसळली. लावण्या ही मुंबईतील चेंबूर परिसरात हनुमान मंदिर एफसीआय येथे तिच्या पालकांसह वास्तव्यास होती. तिच्या मावशीचे रविवारी २१ एप्रिल रोजी लग्न असल्याने लावण्या आजोळी आली होती. ती त्यांच्या घराच्या गच्चीवर मुलांसह खेळत होती. शनिवारी हळदी आणि देवकार्याचे कार्यक्रम होते. रविवारी सकाळी लावण्याच्या मावशीचे लग्न होते. मात्र अवकाळी पावसामुळे ही दुर्दैवी घटना घडल्याचे सांगण्यात आले. लावण्याच्या मृत्यूमुळे लग्नसराई असलेल्या घरात दुःखाचा डोंगर कोसळला आहे. अवकाळी पावसामुळे सोलापूर शहर आणि जिल्ह्यातील अक्कलकोट, दक्षिण सोलापूर तालुक्यासह परिसरात धुमाकूळ घातला. त्यात शेतकऱ्यांच्या फळझाडांचं मोठ्या प्रमाणात नुकसान झाले आहे. अवकाळी पावसात वीज कोसळल्याने ८ वर्षीय लावण्या हनुमंता माशाळे या बालिकेचा अंत झाला आहे. ही हृदयद्रावक घटना दक्षिण सोलापूर तालुक्यातील मुस्ती येथे सायंकाळी चार वाजण्याच्या सुमारास घडली आहे.लावण्याचे मावशीचे लग्न रविवारी सोलापूर येथे संपन्न होणार आहे. लावण्याची आई नववधू सोबत शनिवारी सकाळीच सोलापूरला आली होती. मृत लावण्याच्या आईने लावण्यास सोबत घेऊन जाण्याचा आग्रह धरला होता. मात्र लावण्याने आजीकडे राहणार, शेतात जाणार असा हट्ट धरला होता. शनिवारी सायंकाळी खेळताना अवकाळी पाऊस सुरू झाला. गच्चीवर खेळताना वादळी वाऱ्यासह वीज कडाडली आणि लावण्याच्या पोटाला स्पर्श करून गेली. लावण्या विजेच्या स्पर्शात गंभीररीत्या भाजली. तिला उपचारासाठी शासकीय रुग्णालयात दाखल केले मात्र उपचारापूर्वीच तिचा मृत्यू झाला. लावण्या मुंबईतील चेंबूर परिसरात हनुमान मंदिर एफसीआय येथे राहते. लावण्याचे वडील मुंबई येथे सिव्हिल इंजिनिअर आहेत. त्यांना तीन मुली आहेत. लावण्या ही सर्वात मोठी होती. मावशीचे लग्न असल्याने सहकुटुंब सोलापुरातील मुस्ती गावात आले होते. घराच्या गच्चीवर इतर लेकरांसह खेळताना ही दुर्दैवी घटना घडली.
