कोल्हापूर: मोदी सरकारने यंदा चारशे पारची घोषणा देत लोकसभा निवडणुकीची जय्यत तयारी करत आहे. उमेदवार निवडीपासून ते प्रचार यंत्रणेपर्यंत मायक्रो प्लॅनिंग करून महायुती सध्या वाटचाल करत आहे. अशातच कोल्हापूर आणि हातकणंगले लोकसभा मतदारसंघाचे उमेदवार प्रा. संजय मंडलिक आणि धैर्यशील माने यांच्या प्रचारासाठी नरेंद्र मोदी यांची सभा कोल्हापुरात घेण्यात येणार असल्याची माहिती राज्य नियोजन मंडळाचे कार्यकारी अध्यक्ष राजेश क्षीरसागर यांनी दिली आहे. येत्या २८ एप्रिल रोजी नरेंद्र मोदी यांची सभा कोल्हापुरातील तपोवन मैदानामध्ये होणार असल्याचे राजेश क्षीरसागर यांनी सांगितले आहे. लोकसभा निवडणुकीची रणधुमाळी जोरदार सुरू असून राजकीय पक्षांच्या नेत्यांच्या सभा घेतल्या जात आहेत. लोकसभा निवडणुकीच्या पहिल्या टप्प्याचे मतदान झाल्यानंतर आता महाराष्ट्रातील ज्या लोकसभा मतदारसंघात दुसऱ्या आणि तिसऱ्या टप्प्यासाठी मतदान होणार आहे. अशा मतदारसंघात आता लक्ष केंद्रित करण्यास सुरुवात केली आहे. कोल्हापूर जिल्ह्यातील दोन्ही लोकसभा मतदारसंघाच्या निवडणुका दुसऱ्या टप्प्यात पार पडणार आहे. कोल्हापूर लोकसभा महायुतीचे शिवसेनेचे उमेदवार प्रा. संजय मंडलिक आणि हातकणंगले लोकसभा मतदारसंघ महायुतीचे शिवसेना उमेदवार धैर्यशील माने यांच्या प्रचारार्थ पंतप्रधान नरेंद्र मोदी यांची जाहीर सभा दि. २८ एप्रिल २०२४ रोजी तपोवन मैदान, कोल्हापूर येथे होणार असल्याची माहिती राज्य नियोजन मंडळाचे कार्यकारी अध्यक्ष राजेश क्षीरसागर यांनी दिली आहे. या सभेस मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजितदादा पवार यांच्यासह केंद्र व राज्य सरकार मधील इतर मंत्री उपस्थित राहणार आहे. यामुळे नरेंद्र मोदी विरोधकांवर कसा निशाणा साधणार? याकडे आता महायुतीतील कार्यकर्त्यांचे लक्ष लागून राहिले आहे.
