चेन्नई : हार न मानणाऱ्या हैदराबादने आयपीएलच्या अंतिम फेरीत दिमाखात प्रवेश केला. हैदराबादकडे यावेळी मोठी धावसंख्या नव्हती. पण गोलंदाजीच्या जोरावर हैदराबादने हा सामना जिंकला. खासकरून शाहबाझ अहमदने राजस्थानच्या मधल्या फळीला धक्के दिले आणि सामना हैदराबादच्या बाजूने झुकवला. हैदराबादला यावेळी २०० धावांचा पल्ला पार करता आला नाही. पण त्यांनी हेन्रिच क्लासिनच्या अर्धशतकाच्या जोरावर १७५ धावा उभारल्या होत्या. हैदराबादच्या १७६ धावांचा पाठलाग करत असताना राजस्थानची सुरुवात चांगली झाली नाही. ठराविर फरकाने राजस्थानेन विकेट्स गमावल्या आणि तिथेच त्यांचा पराभव झाला. त्यामुळे हैदराबादने राजस्थानवर ३६ धावांनी विजय साकारला आणि अंतिम फेरीत प्रवेश केला. पण राजस्थानच्या ध्रुव जुरेलने धडाकेबाज फटकेबाजी करत संघाच्या विजयाची आशा जीवंत ठेवली होती. जुरेलने अर्धशतकही झळकावले. पण त्याची ही खेळी विजयासाठी तोकडी ठरली.हैदराबादच्या १७६ धावांचा पाठलाग करतान राजस्थानची सुरुवात संथपणे झाली. त्यामध्ये चौथ्या षटकात राजस्थानला हैदराबादचा कर्णधार पॅट कमिन्सने पहिला धक्का दिला. त्यामुळे राजस्थानची १ बाद २४ अशी अवस्था झाली होती. पण त्यानंतर यशस्वी जैस्वालने दमदार फटकेबाजी केली. भुवीच्या एकाच षटकात यशस्वीने तीन चौकार आणि एक षटकार लागवला. त्यामुळे आता यशस्वी मोठी खेळी साकारणार, असे वाटत होते. यशस्वी अर्धशतकाच्या दिशेने वाटचाल करत होता. पण त्यावेळी शाहबाद अहमदने यशस्वीला बाद केले आणि राजस्थानला मोठा धक्का बसला. यशस्वीला यावेळी २१ चेंडूंत ५ चौकार आणि चार षटकारांच्या जोरावर ४२ धावा करता आल्या. यशस्वी बाद झाला आणि त्यानंतर राजस्थानचा डाव गडगडायला सुरुवात झाली.यशस्वी बाद झाल्यावर संजू सॅमसन १० धावांवर बाद झाला. त्यानंतर फलंदाजीला आला होता तो फॉर्मात असलेला रायन पराग. पण या सामन्यात परागची दाजू चालली नाही. कारण पराग यावेळी सहा धावांवर बाद झाला आणि राजस्थानला अजून एक मोठा धक्का दिला. त्यानंतर राजस्थानने आर. अश्विनला बढती देत प्रयोग केला खरा, पण हा प्रयोग त्यांच्या अंगलट आला. कारण अश्विन यावेळी शून्यावर बाद झाला. पुन्हा एकदा शाहबाझ अहमद हैदराबादच्या मदतीला धावून आला. अश्विन बाद झाल्यावर राजस्थानने इम्पॅक्ट प्लेअर म्हणून शिमरॉन हेटमायरला उतरवले होते. हेटमायरकडे सर्वांच्या नजरा लागल्या होत्या. पण हेटमायर यावेळी अपयशी ठरला. अभिषेक शर्माने हेटमायरला ४ धावांवर बाद केले. त्यामुळे हेटमायरची ६ बाद ९६ अशी स्थिती झाली होती. तिथेच हा सामना राजस्थानच्या हातून निसटल्याचे पाहायला मिळाले.तत्पूर्वी, हैदराबादला १७५ धावा करता आल्या त्या हेन्रीच क्लासिनच्या अर्धशतकाच्या जोरावर. क्लासिनने यावेळी ५० धावांची दमदार खेळी साकारली. हैदराबादकडून यावेळी राहुल त्रिपाठी (३७) आणि ट्रेव्हिस हेड (३४) यांनी चांगलाच हातभार लावला. त्यामुळे राजस्थानच्या संघाला सन्मानजनक धावसंख्या उभारता आली.राजस्थानकडून यावेळी ट्रेंट बोल्ट आणि आवेश खान यांनी प्रत्येकी तीन विकेट्स मिळवले. संदीप शर्माने यावेळी दोन विकेट्स मिळवत त्यांना चांगली साथ दिल्याचे पाहायला मिळाली.
