म. टा. खास प्रतिनिधी, नाशिक : उत्तर महाराष्ट्रातील नाशिक, दिंडोरीसह धुळे लोकसभा मतदारसंघासाठी आज मतदानप्रक्रिया पार पडणार आहे. नाशिकमधील ३१, दिंडोरीतील १०, तर धुळ्यातील १८ उमेदवारांचे भवितव्य ‘ईव्हीएम’मध्ये बंद होणार आहे. उमेदवारांनी गेल्या काही दिवसांत मतदारसंघ पिंजून काढला. सजग मतदार कोणाच्या गळ्यात खासदारकीची माळ घालणार व कोणाला पराभवाची चव चाखावी लागणार, हे आजच्या मतदानातून स्पष्ट होणार आहे. दरम्यान, मतदान प्रक्रिया सुरळीतपणे पार पाडण्यासाठी जिल्हा प्रशासनासह पोलिस यंत्रणाही सज्ज झाली आहे. निवडणूक कर्मचारी ‘ईव्हीएम’ घेऊन रविवारी मतदान केंद्रांकडे रवाना झाले.लोकसभा निवडणूक हा लोकशाहीचा सर्वात मोठा उत्सव आहे. १८ व्या लोकसभेसाठी राज्यात पाचव्या टप्प्यात आज, सोमवारी (दि. २०) मतदान होत आहे. सकाळी सात ते सायंकाळी सहा या कालावधीत मतदारांना मतदान करता येणार आहे. नाशिकमध्ये तब्बल ३१ उमेदवारांनी या निवडणुकीत दंड थोपटले आहेत. त्यापैकी प्रमुख चार-पाच उमेदवारांमध्येच लढत असणार आहे. दिंडोरीत प्रामुख्याने महाविकास आघाडी व महायुतीमध्ये दुरंगी लढत रंगणार आहे. नाशिक आणि दिंडोरी लोकसभा मतदारसंघातील एकूण ३८ लाख ८३ हजार ५११ मतदारांना मतदानाचा हक्क बजावण्याची संधी मिळाली आहे. त्यापैकी २० लाख ३० हजार १२४ मतदार नाशिकमध्ये, तर १८ लाख ५३ हजार ३८७ मतदार दिंडोरी लोकसभेतील सहा विधानसभा मतदारसंघांतील आहेत. प्रत्येक केंद्रावर केंद्र प्रमुख, तीन मतदान अधिकारी, प्रत्येकी एक पोलिस व शिपाई अशा सहा कर्मचाऱ्यांची नियुक्ती करण्यात आली आहे. नाशिकमधील ९५५, तर दिंडोरीतील ९६१ केंद्रांवर वेबकास्टिंगची तयारी पूर्ण झाली आहे. २०१९ मध्ये झालेल्या लोकसभा निवडणुकीत देशातील आणि राज्यातील सरासरी मतदानाच्या टक्केवारीपेक्षाही नाशिक आणि दिंडोरीत कमी मतदान झाले होते. त्यामुळे यंदा तरी मतदानाचा टक्का वाढावा, यासाठी जिल्हा प्रशासनाकडून सर्वतोपरी प्रयत्न करण्यात येत आहेत. यावेळी किमान ७० टक्के मतदान होईल, अशी आशा प्रशासनाला आहे.मतदान केंद्रांवरील सुविधामतदान केंद्रांवर वॉटरप्रूफ मंडप, आरोग्य विभागाचे पथक, प्रथमोपचार पेटी तसेच औषधे, पाळणाघर, मतदारांना बसण्यासाठी सुविधा, पिण्याचे शुद्ध पाणी या सुविधा उपलब्ध असणार आहेत. याशिवाय जिल्ह्यातील मतदान केंद्रांवर एकूण २ हजार ३१७ ठिकाणी व्हीलचेअरची सुविधा पुरविण्यात आली आहे. दिव्यांग व वृद्ध अशा ६२२ मतदारांनी केलेल्या मागणीनुसार त्यांना वाहतूक सुविधा पुरविण्यात येणार आहे. १०८ मॉडेल पोलिंग बूथजिल्ह्यात १०८ मॉडेल पोलिंग बूथची निर्मिती करण्यात आली आहे. मतदारसंघनिहाय विशेष थीमवर दोन पोलिंग बूथ, महिला विशेष दोन, दिव्यांग विशेष एक अशा एकूण १०८ पोलिंग बूथची निर्मिती केली आहे. मॉडेल पोलिंग बूथवर विविध थीमवर सुशोभीकरण केले जाणार आहे. सेल्फी पॉइंट, रांगोळी सजावट, मतदान जनजागृतीबाबतचे बॅनर्स तेथे पहायला मिळणार आहेत.वायरलेस यंत्रणा सज्जजिल्ह्यातील दुर्गम भागातील १०३ मतदान केंद्रांमध्ये मोबाइल नेटवर्कला अडचण असल्याने वायरलेस यंत्रणेची उभारणी करण्यात आली आहे. नाशिक मतदारसंघातील १९ आणि दिंडोरीतील ६२ केंद्रांचा त्यामध्ये समावेश आहे. बहुतांश केंद्रे पेठ, सुरगाणा व त्र्यंबकेश्वर तालुक्याच्या हद्दीत आहेत. यासाठी ‘रनर्स’ची नेमणूक करण्यात आली आहे. ते मतदान केंद्रांवरील दर दोन तासांच्या मतदानाची माहिती तालुक्यापर्यंत पोहोचविणार आहेत.
