https://ift.tt/uc4yhlB
कोल्हापूर (नयन यादवाड): कोल्हापूरचा एकच आवाज शाहू महाराज शाहू महाराज म्हणत कोल्हापूरकरांनी मान आणि मत दोन्ही गादीला देत तब्बल 1 लाख 53 हजार 49 मतांनी विजयी करत यांना संसदेत पाठवले आहे. त्यांच्या विरोधात असलेले महायुतीचे उमेदवार यांचा पराभव झाला असून पुन्हा एकदा आमदार सतेज पाटील हे किंगमेकर च्या भूमिकेत दिसले असून तब्बल 28 वर्षानंतर काँग्रेस पक्षाच्या हात या चिन्हावर कोल्हापुरातून खासदार निवडून आणण्यात सतेज पाटील यांना मोठ यश आले आहे.
शाहू महाराज छत्रपती कोल्हापूरचे खासदार
पुरोगामी विचारांचा जिल्हा म्हणून ओळखल्या जाणाऱ्या कोल्हापूर लोकसभा मतदारसंघात महाविकास आघाडी कडून शाहू छत्रपती महाराज यांना उमेदवारी देण्यात आली होती. तर यांच्या विरोधात महायुती कडून विद्यमान खासदार संजय मंडलिक निवडणूक रिंगणात होते. दोन्ही बाजूकडून झालेल्या जोरदार प्रचारानंतर राज्यात सर्वाधिक 71.22 % मतदान या मतदारसंघात झाले होते त्यामुळे या मतदारसंघातून विजयी कोण होणार याकडे सर्वांचे लक्ष लागून राहिले होते.आज सकाळी आठ वाजल्यापासून रमनमळा परिसरात शासकीय गोदाम येथे कोल्हापूर लोकसभा मतदार संघातील मतमोजणी ला सुरूवात झाली आणि पहिल्या फेरीत महाविकास आघाडीचे श्रीमंत शाहू महाराज छत्रपती हे 6 हजार 224 मताधिक्याने पुढे राहिले .एकुण 31 फे-यामध्ये शाहू महाराज हेच मतांच्या आघाडीवर कायम राहिले. संजय मंडलिक यांना त्यांच्या कागल तसेच चंदगड विधानसभा मतदारसंघातुन लाखांहून मताधिक्य मिळेल असा दावा केला जात होता. मात्र मंत्री हसन मुश्रीफ तसेच समरजीत घाटगे, आमदार राजेश पाटील यांच्या आवाहनाला जनतेने नाकारल्याचे दिसून आले. सुरुवातीपासून काही फेऱ्यांमध्ये कागलमध्येच एकमेव संजय मंडलिक यांना 14 हजार 426 एवढेच मताधिक्य मिळाले.तर कागल वगळता चंदगड,करवीर,राधानगरी,कोल्हापूर उत्तर, कोल्हापूर दक्षिण या सर्वच विधानसभा मतदारसंघात शाहू महाराजांना मताधिक्य मिळाले असून शेवटच्या फेरी अखेर श्रीमंत शाहू महाराज छत्रपती हे 1 लाख 53 हजार 49 मतांनी विजयी झाले.
महायुती मध्ये दिग्गज नेते तरी देखील पराभव
शिवसेनेमध्ये झालेल्या बंडखोरी नंतर विद्यमान खासदार संजय मंडलिक यांनी शिंदे गटासोबत गेले. यानंतर या मतदारसंघातून महाविकास आघाडी कडून ही जागा काँग्रेसकडे गेली आणि काँग्रेसच्या तिकिटावर राजर्षी छत्रपती शाहू महाराजांचे वंशज शाहू महाराज छत्रपती यांना उमेदवारी देण्यात आली. सुरुवातीपासूनच ही निवडणूक भाजप विरुद्ध जनता असा करण्याचा प्रयत्न महाविकास आघाडी करून करण्यात येत होता. मात्र महायुतीकडून संजय मंडलिक यांना उमेदवारी जाहीर झाली आणि प्रचारादरम्यान मंडलिक यांच्याकडून दत्तक प्रकरणाचा जुना वाद नाहक उकरून काढत छत्रपती घराण्याची बदनामीचा प्रयत्न करण्यात आला. शिवाय महायुती कडून मान गादीला पण मत मोदी ला म्हणत मोहीम राबवण्यात आली. मात्र हेच मुद्दे कोल्हापूरकरांना मात्र रुचले नाहीत. अशातच महायुतीने पंतप्रधान नरेंद्र मोदी यांची देखील कोल्हापुरात सभा घेतली मात्र या सभेचा प्रभाव पडला नाही. तसेच मुख्यमंत्री एकनाथ शिंदे यांनी देखील कोल्हापुरात तळ ठोकून मंडलिक यांच्या विजयासाठी सर्वतोपरी प्रयत्न केले मात्र कोल्हापूरकरांनी याला सपशेल झिडकारत आपले मत आणि मानही शिवशाहूंच्या गादीला दिला. यामुळे महायुतीने ज्या मुद्द्यांना घेऊन जनतेसमोर आले तेच मुद्दे संजय मंडलिक यांच्या पराभवाला कारणीभूत ठरल्याचे बोलले जात आहे.
आमदार सतेज पाटील विजयाचे शिल्पकार
जिल्ह्यातील कोणतीही निवडणूक असू दे ती अंगावर घ्यायची आणि आपल्या उमेदवाराला निवडून आणायचच अशी आमदार सतेज पाटील यांची राज्यभरात ओळख झाली आहे. शाहू महाराज छत्रपती यांना उमेदवारी मिळाल्यानंतर आमदार सतेज पाटील यांनी अगदी निवडणूक जाहीर झाल्यापासून पायाला भिंगरी बांधत मतदारसंघ पिंजून काढला होता. सूक्ष्म नियोजनापासून ते या संपूर्ण निवडणूक प्रक्रियेत होते. सोशल मीडियापासून ते होम टू होम प्रचारापर्यंत सतेज पाटील यांची यंत्रणा शाहू महाराजांच्या मागे रात्रंदिवस काम करत होती. आणि याचाच शाहू महाराजांना फायदा झाला आणि त्यांना अपेक्षित नसलेल्या कागल विधानसभा मतदारसंघासह राधानगरी, चंदगड मधूनही मताधिक्य मिळवण्यात यश आले. याशिवाय दिवंगत आमदार पी एन पाटील यांच्या करवीर विधानसभा मतदार संघातून देखील मोठ मताधिक्य मिळाल्याने शाहू छत्रपती महाराज हे सुमारे दीड लाखाच्या मतफरकांनी निवडून आले. यामुळे या निवडणुकीत देखील सतेज पाटील हे किंगमेकर च्या भूमिकेत पाहायला मिळाले निकालाचे कल हाती येतात शाहू महाराज यांच्या न्यू पॅलेस येथे आणि सतेज पाटील यांचा अजिंक्य कार्यालय येथे डीजे डॉल्बीचा दणदणाट आणि गुलालाची उधळण करत कार्यकर्त्यांनी जल्लोष साजरी करण्यास सुरुवात केली.
गड आला पण सिंह गेला
पुरोगामी कोल्हापूर जिल्ह्याने देशासह राज्याला कायम दिशा देण्याचं काम केलं आहे. 1999 साली खासदार होण्याची इच्छा होती मात्र ती इच्छा आज 25 वर्षांनी पूर्ण झाली. माझ्या विजयात कोल्हापूरकरांचा मोठा वाटा आहे. स्वाभिमानी कोल्हापूरकरांनी मला विजयी करून एकाधिकारशाहीला स्पीड ब्रेकर लावण्याचे काम केलं आहे. अशी प्रतिक्रिया कोल्हापूरचे नवनिर्वाचित खासदार शाहू छत्रपती महाराज यांनी व्यक्त केली. तसेच आज मी खासदार झालो मात्र गड आला पण सिंह गेला असे म्हणत करवीरचे दिवंगत आमदार पी एन पाटील यांना हा विजय समर्पित केल्याची भावना शाहू महाराजांनी व्यक्त केली तसेच यापुढे स्थानिक,राज्य आणि केंद्रीय पातळीवर जनतेच्या नागरी समस्या सोडविण्यास प्राधान्य देणार असल्याचेही त्यांनी सांगितले. तसेच आपल्या विजयासाठी कष्ट घेतलेले दिवंगत आमदार पी.एन.पाटील तसेच कोल्हापूरच्या जनतेला हा विजय समर्पित करत असल्याचेही खासदार शाहू महाराज म्हणाले.
