नवी दिल्ली: करून देतो सांगत सुमारे एक हजारहून अधिक लोकांची फसवणूक केलेल्या एका टोळीचा दिल्ली पोलिसांनी पर्दाफाश केला. हे लोक बँक अकाउंट किंवा फोन नंबरशी आधार कार्ड लिंक करून देण्याच्या नावावर फसवून बँक आणि अन्य डिटेल्स विचारून घेत असत. त्यानंतर गरीबांना पैसे देऊन त्यांच्या कागदपत्रांवर पत्ता बदलून घ्यायचे आणि त्या पत्त्यावर बँक अकाउंट उघडून लोकांची खाती रिकामी करायचे. पोलिसांनी अनेक बँकांमधील अशी सुमारे ११०० खात्यांचा माग काढला आहे. या टोळीचं जाळं अनेक राज्यात पसरलं आहे. पोलीस उपअधीक्षक अँटो अल्फोन्स यांनी सांगितलं की झारखंडच्या अलीमुद्दीन अन्साली (२७) या टोळीचा म्होरक्या आहे. पोलिसांनी अलीमुद्दीन आणि आझमगडच्या मनोज यादवला अटक केली आहे. त्यांच्याकडे वेगवेगळ्या बँक खात्यांचे ८१ डेबिट कार्ड, १०४ चेकबुक, १३० पासबुक, ८ फोन, ३१ सिमकार्ड, आयडी प्रूफच्या झेरॉक्स जप्त केल्या आहेत. अलीमुद्दीनने पोलीस चौकशीत सांगितले की तो गरीबांना आमिष दाखवून खातं उघडून घेई. यानंतर लोकांना फसवून या खात्यांमध्ये पैसे जमा करायला सांगे आणि काही मिनिटांत पैसे काढून घेई. कशी उघडली जात होती खाती अल्फोन्स यांनी सांगितले की, अनेक बँकांमध्ये ११०० खाती उघडली गेली आहेत. या टोळीतील मनोज यादव पैशांच्या हिशेब ठेवत असे आणि गरीबांच्या नावे बँकांमध्ये खाते उघडत असे. यासाठी मनोज मजुरी करणाऱ्या मजुरांच्या संपर्कात राही आणि त्यांना प्रत्येक खात्याचे दोन हजार रुपये देई. पैसे देऊन तो या लोकांचे आधार, पॅन डिटेल्स घेई. या लोकांसोबत जाऊन आधार कार्डवरचा पत्ता बदलवून घेई आणि या चुकीच्या पत्त्यावर खातं उघडत असेल. या दरम्यान मनोज स्वत:चा नंबरही बँकेत रजिस्टर करत असे. खात्याचं पासबुक, डेबिट कार्ड, चेक बुक तो आपल्याजवळ ठेवत असे. या खात्यांचा उपयोग ज्यांना फसवायचं त्या लोकांच्या अकाउंटमधून पैसे ट्रान्सफर करण्यासाठी करून घेत असे. एकदा एका खात्याचा वापर झाला की पुढचे अनेक महिने ते खातं वापरलं जायचं नाही. कशी व्हायची फसवणूक अलीमुद्दीन आणि त्याचे लोक फोन करून टेलिकॉम कंपनीच्या कस्टमर केअरमधून बोलत असल्याचे सांगायचे. त्यांनतर त्याचे बँक खाते क्रमांक, फोन नंबर आधारला लिंक करायचं असं सांगून डिटेल्स घ्यायचे. नंतर त्यांना एक मेसेज पाठवायचे आणि तो मेसेज १२१ क्रमांकावर फॉरवर्ड करायला सांगायचे. हा क्रमांक सिम लॉक करण्यासाठी वापरला जातो. यानंतर या लोकांचं सिम डिअॅक्टिवेट व्हायचं आणि नवं सिम अॅक्टिवेट व्हायचं. नव्या सिमद्वारे सर्व ओटीपी अलीमुद्दीनला यायचे. त्याद्वारे तो व्यवहार करायचा.
