श्रीनगर: पंजाबमध्ये चायनीज ड्रोन्सच्या सहाय्याने शस्त्रास्त्रे आणत असलेल्या घटनेची केंद्र सरकारने गंभीर दखल घेतली आहे. पाकिस्तानच्या या कुरापती लक्षात घेता केंद्राने रेड अॅलर्ट जारी करत बीएसएफला सतर्क राहण्याचे आदेश दिले आहेत. सीमेवर होणाऱ्या हवाई घुसखोरीवर डोळ्यात तेल घालून लक्ष ठेवण्याचे आदेशही बीएसएफला देण्यात आले आहेत. पंजाबमध्ये खलिस्तानी दहशतवादी मॉड्युलचा पर्दाफाश झाल्यानंतर पाककडून पंजाबमध्ये ड्रोनद्वारे आणला जात असल्याचं उघड झालं आहे. पंजाबच्या तरन-तारन जिल्ह्यात काही दिवसांपूर्वी चार खलिस्तानी पकडण्यात आले होते. त्यांच्याकडून जप्त करण्यात आलेल्या शस्त्रसाठ्यात एके-४७चाही समावेश होता. या शस्त्रांचा पुरवठा जीपीएस फिटेड ड्रोनद्वारे करण्यात आल्याचं उघड झालं होतं. धक्कादायक बाब म्हणजे जीपीएस फिटेड ड्रोनने पाकिस्तानातून तब्बल सात वेळा भारतात घुसखोरी केली आहे. या ड्रोनद्वारे १० किलोग्रॅमपर्यंतचं सामान वाहून नेण्यात येतं. त्यात शस्त्रास्त्र, दारुगोळा, बनावट नोटांचा समावेश आहे. विशेष म्हणजे ही सर्व सामग्री पोलिसांनी खलिस्तानी अतिरेक्यांकडून जप्तही केली आहे. त्यामुळेच बीएसएफ जवानांना सतर्क राहण्याचे आदेश देण्यात आले आहेत. आंतरराष्ट्रीय सीमेवर कोणतेही ड्रोन दिसताच गोळ्या झाडण्याचे आदेश जवानांना देण्यात आल्याचं एका अधिकाऱ्याने सांगितले. या शिवाय कुपवाडा, बारामुला, पुंछ आणि राजौरी आदी सीमावर्ती परिसरात पेट्रोलिंगही वाढवण्यात आली आहे. दरम्यान, प्रचंड बंदोबस्तामुळे सध्या तरी ड्रोनद्वारे शस्त्रास्त्राचा पुरवठा होण्याची शक्यता नसल्याचं दक्षिण पश्चिम विंगचे चीफ लेफ्टनंट जनरल आलोक सिंह यांनी सांगितलं.
