पॅरिस: दुसऱ्या महायुद्धादरम्यान ज्यूंच्या नरसंहारात फ्रान्सच्या भूमिकेची कबुली देणारे फ्रान्सचे माजी अध्यक्ष यांचे गुरुवारी निधन झाले. ते ८६ वर्षांचे होते. सन २००३ मध्ये अमेरिकेने इराकवर केलेल्या हल्ल्याचा विरोध करणारे पहिले नेते म्हणूनही त्यांची ओळख होती. शिराक यांचे जावई फ्रेडरिक सलात-बारौक्स यांनी शिराक यांच्या निधनाचे वृत्त दिले. त्यांचे निधन झाले त्यावेळी त्यांचा परिवार त्यांच्या जवळ होता, असे फ्रेडरिक यांनी सांगितले. मात्र शिराक यांच्या निधनाचे कारण त्यांनी सांगितले नाही. सन २००७ मध्ये राष्ट्राध्यक्षपद सोडल्यानंतर शिराक यांना अनेक आजारांनी ग्रासले होते. सन १९९५ ते २००७ या कालावधीत शिराक फ्रान्सचे अध्यक्ष होते. १२ वर्षांच्या या कार्यकाळात ते सर्वोत्तम वैश्विक मुत्सद्दी म्हणून नावारूपाला आले. मात्र आर्थिक सुधारणा करण्यात तसेच पोलिस आणि अल्पसंख्याक समाजातील तरुणांमधील तणाव कमी करण्यात शिराक यांना यश आले नाही. परिणामी २००५ मध्ये फ्रान्समध्ये दंगली उसळल्या होत्या. राष्ट्राध्यक्ष होण्यापूर्वी सुमारे दोन दशके शिराक हे पॅरिसचे महापौर देखील होते. कारकिर्दीच्या सुरुवातीला दृढनिश्चयी आणि महत्त्वाकांक्षी स्वभावामुळे शिराक यांना 'ले बुलडोझर' या टोपणनावाने ओळखले जात होते. महापौर असताना पक्षासाठी चुकीच्या मार्गाने निधी गोळा केल्याचा, निधीचा दुरुपयोग केल्याचा तसेच लाच घेतल्याचा आरोप त्यांच्यावर करण्यात आला होता. २००७ मध्ये राष्ट्राध्यक्षपदावरून दूर झाल्यानंतर शिराक यांच्यावर रितसर आरोपपत्र दाखल करण्यात आले. त्यानंतर २०११ मध्ये जनतेच्या पैशाचा दुरुपयोग, विश्वासघात केल्याप्रकरणी त्यांना दोन वर्षे तुरुंगवासाची शिक्षा ठोठावण्यात आली होती.
