नवी दिल्लीः सोशल मीडियावर टिकटॉकचा व्हिडिओ अपलोड करून लोकांची वाहवा मिळवणाऱ्या सोनाली फोगाटला भाजपने निवडणुकीच्या मैदानात उतरवले खरे पण, या निवडणुकीत तिचा दारुण पराभव झाला आहे. पराभूत झाल्यानंतर सोनाली फोगाटला अश्रू अनावर झाले असून तिचा हा व्हिडिओ सध्या सोशल मीडियावर चांगलाच व्हायरल झाला आहे. सोनाली फोगाट यांनी हरियाणामधील आदमपूर विधानसभा मतदार संघातून भाजपच्या तिकीटावर निवडणूक लढवली आहे. सोनाली फोगाटचे टिकटॉकवर १२२.४ हजार फॉलोअर्स आहेत. सोनालीने चित्रपट आणि टीव्ही शोमध्येही काम केलेले आहे. टिकटॉकवर सोनाली खूपच लोकप्रिय आहे. तिच्या एका-एका व्हिडिओला दिवसभरात ५० हजारहून अधिक व्ह्यूज मिळतात. हरयाणामधून सोनालीला भाजपचे तिकीट मिळाल्यानंतर तिच्या फॉलोअर्सच्या संख्येत मोठी वाढ झाली होती. टिकटॉकवर सोनाली फोगाट हिचे व्हिडिओ लोकांना खूप पसंत पडतात. तसेच तिचे व्हिडिओ सोशल मीडियावरही मोठ्या प्रमाणात शेअर केले जातात. भाजपचे तिकिट मिळाल्यानंतर सोनालीने रस्त्यावर उतरून तसेच टिकटॉकवरून जोरदार प्रचार केला होता. काँग्रेस पक्षाचे उमेदवार कुलदीप बिश्नोई यांच्याविरोधात सोनालीने निवडणूक लढवली परंतु, या निवडणुकीत अखेर काँग्रेसच्या कुलदीप बिश्नोईचा विजय झाला आहे. या ठिकाणी इंडियन नॅशनल लोकदल यांनीही आपला उमेदवार दिला होता. विशेष म्हणजे, सोनालीचे पती संजय फोगाट हे भाजपचे नेते होते. पतीच्या निधनानंतर सोनालीने भाजपत प्रवेश केला होता. भाजपने सोनालीला पक्षाचे प्रदेश महिला मोर्चाचे उपाध्यक्ष बनवले होते.
