मुंबई: आणि यांची धमाकेदार जोडी पुन्हा एकदा मोठ्या पडद्यावर एकत्र येतेय. 'मुन्नाभाई एमबीबीएस'मधली त्यांची मुन्ना आणि सर्किट ही जोडी खूप गाजली होती. त्यानंतर हे दोघे पुन्हा कधी एकत्र येणार याची चाहत्यांना उत्सुकता होती. यावेळी ते 'मुन्नाभाई'च्या सिक्वेलसाठी एकत्र येत नसून, एका वेगळ्या नवीन सिनेमात झळकणार आहेत. अर्शद वारसीनं एका वृत्तपत्राला दिलेल्या मुलाखतीत याबद्दल माहिती दिली. अर्शद म्हणाला, 'संजू आणि मी पुढील वर्षी येणाऱ्या एका सिनेमात एकत्र काम करणार आहोत. सिनेमाचं नाव ठरलं नसून, दिग्दर्शक साजिद-फरहाद याचं दिग्दर्शन करणार आहेत. पुढच्या वर्षी मार्च किंवा एप्रिलमध्ये या चित्रपटाचे चित्रीकरण सुरू होणार आहे.' या चित्रपटाबद्दल अधिक माहिती देताना अर्शद म्हणाला की, 'या चित्रपटाची स्क्रिप्ट अतिशय धम्माल आणणारी आहे. या चित्रपटात संजू एका अंधळ्या डॉनची भूमिका साकारत आहे आणि मी त्यांच्या साथीदाराचं काम करणार आहे जो वेळोवेळी त्याचे डोळे बनतो आणि त्याला मदत करतो. संजयनं साकारलेला डॉन अंधळा आहे हे मात्र आम्हाला कोणलाच कळू द्यायचे नसते त्यामुळे ते लपवणं, त्याला मदत करणं आणि त्यातून काय धम्माल घडते हे सगळंच तुम्हाला पाहाता येणार आहे. ' असं अर्शद म्हणाला. दरम्यान, संजय दत्त हा आशुतोष गोवारीकर दिग्दर्शित आणि बहुचर्चित 'पानिपत: द ग्रेट बेट्रेयल' या चित्रपटात अफगाणिस्तानचा शासक अहमद शहा अब्दालीच्या भूमिकेत दिसणार आहे. डोक्यावर जिरेटोप, छातीवर चिलखत, डोळ्यात सुरमा अशा लुकमध्ये संजय दत्त दिसतो आहे. 'अहमद शहा अब्दाली- ज्यावर याची सावली पडली, त्याचा मृत्यू निश्चित! ' असं लिहून आशुतोष गोवारीकर यांनी फोटो शेअर केला आहे. या चित्रपटाचा ट्रेलर प्रदर्शित झाल्यावर संजय दत्त प्रेक्षकांच्या पसंतीस उतरल्याचं सोशल मीडियावर दिसून येतंय. तसंच, बॉलिवूडचा मुन्नाभाई संजय दत्त छोट्या पडद्यावर एंट्री घेतोय. ‘जग जननी माँ वैष्णोदेवी- कहानी माता रानी की’ या नव्या पौराणिक मालिकेचं निवेदन तो करणार आहे. संजय या प्रोजेक्टसाठी खूप उत्सुक असल्याचंही समजतंय. त्यानं अशा प्रकारचं काम यापूर्वी कधीही केलेलं नाही. त्यामुळे त्याच्यासाठी हा अगदी वेगळा अनुभव असेल. संजू बाबा त्याच्या स्टाइलनं कशा प्रकारे सूत्रसंचालन करतोय हे पाहणं उत्सुकतेचं ठरेल.
