मुंबईः राष्ट्रवादीचे नेते अजित पवार यांनी बंड पुकारून भाजपला पाठिंबा दिल्यानंतर बेपत्ता झालेल्या आमदारांपैकी राष्ट्रवादीचा आणखी एक आमदार परत येणार असल्याची माहिती राष्ट्रवादीचे नेते नवाब मलिक यांनी ट्विटरवरून दिली आहे. राष्ट्रवादीकडे सध्या ४९ आमदारा असल्याची माहिती आहे. त्यामुळे आणखी एक आमदार शरद पवार यांच्या गटात परतणार असल्याने ही संख्या ५० वर जाण्याची शक्यता आहे. राज्यात शिवसेना-काँग्रेस-राष्ट्रवादी या तीन पक्षाचं सरकार अस्तित्वात येणार असल्याचे जवळपास निश्चित झाले असताना शनिवारी सकाळी भाजपने राजकीय सर्जिकल स्ट्राइक लगावला आहे. देवेंद्र फडणवीस यांनी दुसऱ्यांदा मुख्यमंत्रिपदाची शपथ घेतली तर त्यांच्यासोबत राष्ट्रवादीचे नेते अजित पवार यांनी उपमुख्यमंत्रिपदाची शपथ घेतली आहे. राजभवनात राज्यपालांनी या दोन्ही नेत्यांना मंत्रिपदाची शपथ दिली. अजित पवार यांना राष्ट्रवादीतील २२ आमदारांचा पाठिंबा असल्याचे सांगण्यात येत आहे. परंतु, त्यांना किती आमदारांचा पाठींबा आहे, हे अद्याप स्पष्ट नाही. शरद पवार यांनी अजित पवारांचा निर्णय वैयक्तिक असल्याचे स्पष्ट केल्याने राज्याच्या राजकारणात आणखी नवीन वळण मिळण्याची शक्यता आहे.
