नवी दिल्ली: सुप्रीम कोर्ट आज (शनिवार) देशातील बहुप्रतीक्षित अयोध्या जमीन वाद प्रकरणावर आपला ऐतिहासिक निकाल देणार आहे. या प्रश्नावर गेल्या अनेक वर्षांपासून देशात राजकारणही होत आले आहे. राम जन्मभूमी आणि बाबरी मशीदीचा हा वाद अनेक दशके जुना आहे. अलाहाबाद कोर्टाने यावर सन २०१० मध्ये निकाल दिला होता. त्यानंतर हायकोर्टाच्या या निकालाला सुप्रीम कोर्टात आव्हान देण्यात आले. सुप्रीम कोर्टाने ४० दिवसांच्या मॅरेथॉन सुनावणी घेतली आणि आज त्यावर ऐतिहासिक निकाल देत आहे. खरे तर या वादात अनेक मुद्द्यांचा समावेश आहे. मात्र, सर्वात मोठा मुद्दा आहे तो जमिनीबाबतचा. हा वाद २.७७ एकर जमिनीचा आहे. या २.७७ एकर वादग्रस्त जमिनीची मालकी नक्की कुणाची हाच सुप्रीम कोर्टापुढील सर्वात महत्त्वाचा प्रश्न आहे. तसे पाहिले तर, अयोध्या वादाचा पाया ४०० वर्षांपूर्वीच रचला गेल्याचे सांगितले जात आहे. मात्र, अलिकडे सन २०१० मध्ये हायकोर्टाने वादग्रस्त जमिनीची तीन भागांमध्ये विभागणी केली होती. यांपैकी एक भाग राम मंदिराचा, दुसरा सुन्नी वक्फ बोर्डाचा आणि तिसरा निर्मोही आखाड्याला मिळाला होता. त्यानंतर सुप्रीम कोर्टाने हायकोर्टाच्या निर्णयाला स्थगिती दिली. या निर्णयाविरुद्ध सुप्रीम कोर्टात १४ अपील करण्यात आले. वादग्रस्त जमीन एकूण २.७७ एकर इतकी आहे. यातील ६७ एकर जमीन सरकारजवळील आहे. तर, वादग्रस्त स्थळाजवळच सुन्नी वक्फ बोर्डाची जमीन आहे. राम जन्मभूमीची एकूण जमीन ४२ एकर आहे. आसपार अनेक मंदिर आहेत. मात्र वाद हा छोट्या भूखंडाबाबतचा आहे. इथेच मशीद आणि रामलल्ला विराजमान आहेत. या भूखंडावर बाबरी मशीदीचा ढांचा, रामलल्ला, राम चबुतरा, सिंहद्वार आणि सीतेचे स्वयंपाकघर आहे. काल रात्री आपल्या वेबसाईटवर सुप्रीम कोर्टाने अयोध्या प्रकरणी उद्या (शनिवार) निकाल देणार असल्याचे स्पष्ट केले. सुप्रीम कोर्टाने तब्बल ४० दिवस या प्रकरणावर सुनावणी घेतली आहे. आज या प्रकरणाचा निर्णायक दिवस असून सरन्यायाधीश रंजन गोगोई यांच्या अध्यक्षतेखालील पीठ या प्रकरणावर आपला निकाल देणार आहे. हा ऐतिहासिक निकाल एकमताने किंवा मग ३-२ अशा बहुमताने वा, ४-१ अशा बहुमताने दिला जाणार असल्याचे संकेत सुप्रीम कोर्टान दिले आहेत.
