ठाणे: शहरातील येथे आज (रविवार) सकाळी एका २४ वर्षीय तरुणीचा मृतदेह आढळल्याने परिसरात खळबळ उडाली आहे. पोलिसांनी हा मृतदेह ताब्यात घेतला असून या मृत तरुणीची ओळख पटवण्याचे प्रयत्न पोलीस करत आहेत. शहरातील तलावपाळी परिसरात दररोज सकाळी शेकडो लोक वॉकिंग आणि जॉगिंगसाठी जात असतात. वॉक करत असलेल्या काहींना तलावपाळी परिसरात एका तरुणीचा मृतदेह पडला असल्याचे दिसले. त्या लोकांपैकी काहींनी तत्काळ याची माहिती पोलिसांना दिली. दरम्यान, या तरुणीने तलावात उडी मारून आत्महत्या केली असावी असा अंदाज पोलिसांनी व्यक्त केला आहे. मात्र, आत्महत्या आहे की हत्या, किंवा आत्महत्या असेल तर त्याचे कारण काय, याबाबत पोलीस तपास करत आहेत. नजिकच्या काळात मुंबई, ठाणे परिसरात हत्या आणि आत्महत्येच्या अनेक घटना उघडकीस आल्या आहेत. काही आठवड्यांपूर्वीच माहीमच्या समुद्र किनाऱ्यावर एका बेवारस सुटकेसमध्ये पुरुषाच्या हातपायांचे तुकडे आढळले होते. माहीम दर्ग्याच्या पाठिमागच्या बाजूला काही तरुणांना ही सुटकेस आढळली होती. या तरुणांनी ती बॅग उघडून पाहिली. त्यानंतर त्या बॅगेत पुरुषाच्या शरीराचे तुकडे असल्याचे स्पष्ट झाले होते. याबरोबरच, काही दिवसांपूर्वी कल्याण स्थानकाबाहेर एका सुटकेसमध्ये एका महिलेचे डोके नसलेला शरीराचा भाग सापडला होता. ही सुटकेस ठेवणारी व्यक्ती सीसीटीव्ही कॅमेर्‍यामध्ये कैद झाली होती.
