नवी दिल्लीः इंटरनेट युजर्ससाठी चिंता वाढवणारी ही बातमी. आपल्या अॅपमध्ये काही मॉलिशस कोड इंजेक्ट केले गेले होते, अशी कबुली ट्विटरने दिलीय. या कोडच्या मदतीने युजर्सची वैयक्तीक माहिती मिळवता येऊ शकत होती आणि भारतासह जगभरातील ट्विटरच्या अनेक युजर्सच्या अकाउंटवर याचा परिणाम दिसून आला होता. गेल्या शुक्रवारी हा प्रकार घडला. यामुळे ट्विटरने आता युजर्सना मेल पाठवून अँड्रॉइड अॅप तात्काळ अपडेट करण्याची सूचना केलीय. हॅकर्सना अँड्रॉइड अॅपच्या मदतीने नॉन पब्लिक अकाउंट्सशी संबंधित माहिती मिळवू शकत होते. तसंच युजर्सच्या अकाउंटवर ताबा मिळवून ते थेट मेसेजही पाठवू शकत होते. कॉम्प्लिकेटेड प्रोसेसच्या मदतीने अॅपमध्ये मॉलिशस कोड टाकता येत होते. यामुळे माहिती युजर्सची मिळवता येत होती. पण ही समस्या आता दूर करण्यात आली आहे, असं ट्विटरने एका स्टेटमेंटमध्ये म्हटलंय.
