नागपूर केंद्र सरकारच्या नागरिकत्व सुधारणा कायद्याच्या विरोधात देशभर वातावरण पेटलेले असताना आज नागपुरात या कायद्याच्या समर्थनार्थ भव्य मोर्चा काढण्यात आला. लोकाधिकार मंच आणि अखिल भारतीय विद्यार्थी परिषदेनं या मोर्चाचं आयोजन केलं आहे. या मोर्चात राज्याचे विरोधी पक्षनेते देवेंद्र फडणवीस देखील सामील झाले आहेत. 'नागरिकत्व कायद्याच्या समर्थनार्थ संपूर्ण नागपूरकर एकजूट झाले आहेत. हा कायदा कुठल्या धर्माच्या किंवा जातीच्या विरोधी जाणार नाही', अशी प्रतिक्रिया फडणवीस यांनी दिली. काही राजकीय पक्ष आणि लोकांद्वारे या कायद्याबाबत समाजात गैरसमज पसरविण्यात येत असल्याचा आरोप देखील फडणवीस यांनी केला. अशा अफवा आणि गैरसमज पसरवणाऱ्यांच्या निषेधार्थ नागपूरकर रस्त्यावर उतरले असल्याचं फडणवीसांनी सांगितलं. नागपूरच्या लोकाधिकार मंचातर्पे या रॅलीचं आयोजन करण्यात आले आहे. यशवंत स्टेडियम ते संविधान चौक अशी ही भव्य रॅली काढण्यात आली. रॅलीत देवेंद्र फडणवीस यांच्यासोबत केंद्रीय मंत्री नितीन गडकरी देखील उपस्थित होते. फडणवीस देखील या रॅलीत झाशीची राणी चौक ते संविधान चौकदरम्यान पायी चालले. यावेळी फडणवीस यांनी राणी लक्ष्मीबाई यांच्या पुतळ्याला पुष्पहार अर्पण करून रॅलीत सहभाग घेतला. रॅलीमध्ये महिलांचा सहभाग लक्षणीय आहे. नागरिकत्व कायद्याच्या समर्थनार्थ जोरदार घोषणाबाजी रॅलीत करण्यात आली. 'जागो जागो हिंदू जागो, घुसपैठियों जल्दी भागो', 'देश को बचना है, सीएए लाना है', अशा जोरदार घोषणा या रॅलीत देण्यात येत आहेत.
