श्रीनगर: काश्मीरमध्ये ठिकठिकाणी हिमस्खलनाच्या घटना घडल्या असून, सोमवारी रात्रीपर्यंत काश्मीर खोऱ्यात किमान १२ जणांचा मृत्यू झाला आहे. सीमा सुरक्षा दलाचा एक आणि लष्कराचे ५ जवान शहीद झाल्याचं वृत्त आहे. गांदरबल जिल्ह्यात सोनमर्गमध्ये हिमस्खलनात पाच नागरिकांचा मृत्यू झाला. तर कुपवाडामध्ये तीन जवान शहीद झाले. हिमस्खलनात गेल्या चार वर्षांत भारताचे ७४ जवान शहीद झाले आहेत. गेल्या आठवड्यात नियंत्रण रेषेजवळ (एलओसी) पुँछमध्ये हिमस्खलनात लष्करातील एक अधिकारी शहीद झाला होता. गेल्या काही दिवसांत काश्मीर आणि लडाखच्या दुर्गम भागात मोठ्या प्रमाणात होत आहे. त्यामुळं पुढील काही दिवस होईल, असा इशारा हवामान विभागानं दिला आहे. नौगाम सेक्टरमध्ये सोमवारी रात्री बीएसएफची चौकी हिमवादळामुळं कोसळली. बर्फाच्या ढिगाऱ्याखालून सहा जवानांना सुखरूप बाहेर काढले, तर एक जवान शहीद झाला. मंगळवारी नियंत्रण रेषेजवळील लष्कराच्या माछिल चौकीत तैनात जवान बर्फाखाली दबले. तेथे पाच जवान शहीद झाले. तर गांदरबल आणि गुरेजमध्ये हिमवादळात सहा नागरिकांचा मृत्यू झाला. चार वर्षांत ७४ जवान शहीद गेल्या चार वर्षांच्या आकडेवारीवर नजर टाकली असता, हिमस्खलनाच्या घटनांमध्ये एकूण ७४ जवान शहीद झाले. २०१६मध्ये हिमस्खलनात १८ जवान शहीद झाले होते. तर २०१७मध्ये हिमवादळामुळं ३० जवान शहीद झाले. २०१८मध्ये सहा जवान शहीद झाले. तर २०१९मध्ये २० जवानांना प्राण गमवावे लागले. पीओकेमध्ये हिमस्खलनात ५७ मृत्यू रॉयटर्सच्या वृत्तानुसार, पाकव्याप्त काश्मीरमध्ये नियंत्रण रेषेच्या पलीकडे सोमवारी आणि मंगळवारी नीलम खोऱ्यात हिमस्खलनाच्या घटना घडल्या. यात किमान ५७ जणांचा मृत्यू झाला आहे. तर अनेक जण बेपत्ता आहेत. स्थानिक प्रशासनानं दिलेल्या माहितीनुसार, हिमस्खलन आणि हिमवादळामुळं घरांचं मोठं नुकसान झालं आहे. बर्फवृष्टी आणि पावसामुळं बचावकार्यात अडथळे येत आहेत.
