नवी दिल्ली: दिल्ली विधानसभा निवडणूक २०२० निकालात एकूण ७० जागांपैंकी ६२ जागांवर विजय मिळवत आपनं पुन्हा एकदा विजयाचा पताका फडकावला. या अरविंद केजरीवाल यांचं तर आहेच परंतु, त्यांच्यासोबत काम करणाऱ्या टीमलाही हे श्रेय जातं. यांना खऱ्या अर्थानं सशक्त करणारी 'टेक्निकल' टीम त्यांच्यासोबत काम करतेय. डिजिटल आणि सोशल मीडिया असो किंवा कार्यकर्त्यांना हाताळणं... ही टीम अरविंद केजरीवाल यांच्यासोबत सतत दिसली. एक ओळख करून घेऊयात याच टीममधल्या काही चेहऱ्यांची... पृथ्वी रेड्डी पृथ्वी रेड्डी हे खरे तर बंगळुरूचे व्यावसायिक... केजरीवाल यांच्यासोबत ते 'इंडिया अगेन्स्ट करप्शन' आंदोलनातही सहभागी झाले होते. नव्हे ते या आंदोलनाच्या कोअर कमिटीचा एक भाग होते. पक्षाचे संस्थापक सदस्य असलेले रेड्डी पक्षासाठी क्राऊड फंडिंग गोळा करण्याचं कामही करतात. यंदाच्या निवडणुकीत त्यांनी एका फ्लॅश मॉब आणि रस्त्यारस्त्यावर सादर केल्या जाणाऱ्या नाट्याद्वारे कार्यकर्त्यांना पक्षाशी जोडण्याचं काम त्यांनी केलं. प्रीती शर्मा मेनन प्रीती या आम आदमी पक्षाच्या राष्ट्रीय कार्यकारी सदस्य आहेत. मुळच्या मुंबईच्या असलेल्या प्रीती यांनी देशाच्या बाहेर पक्षाची पोहोच नेणं असो किंवा फंडिंग वाढवणं प्रीती यांनी या जबाबदाऱ्या समर्थपणे हाताळल्या. प्रीती यादेखील इंडिया अगेन्स्ट करप्शन आंदोलनापासून पक्षाशी जोडल्या गेल्यात. अनेक वरिष्ठ नेते आणि कंत्राटदारांचा भ्रष्ट कारभार जनतेसमोर आणण्याचं काम त्यांनी केलं. कपिल भारद्वाज पक्षाची कार्यपद्धती, मीडिया हाताळणी, पीआर यांसारख्या जबाबदाऱ्या पेलणारा आपचा चेहरा म्हणजे कपिल भारद्वाज. दिल्लीशिवाय राष्ट्रीय पातळीवर पक्षाची इमेज योग्य पद्धतीनं पोहचेल याची काळजी भारद्वाज यांनी घेतली. जास्मीन शाह दिल्ली विधानसभा निवडणुकीसाठी बनवण्यात आलेल्या पक्षाचा जाहिरनामा बनवणाऱ्या समितीचा एक भाग होते जास्मीन शाह. पक्षाच्या 'संवाद आणि विकास समिती'चे उपाध्यक्ष म्हणून त्यांनी काम पाहिलं. सरकारच्या अनेक योजना कशा राबवायच्या याचा आराखडा ठरवण्यात त्यांचा हातभार होता. 'आयआयटी मद्रास'मधून बीटेक-एमटेक पदवी घेतल्यानंतर जास्मीन यांनी कोलंबिया युनिव्हर्सिटीमधूनही पदवी संपादन केली. त्यानंतर १२ वर्ष खासगी आणि समाजसेवी संस्थांमध्ये काम केल्यानंतर २०१६ साली ते आपशी जोडले गेले. हितेश परदेशी डिजिटल कंटेन्ट इंडस्ट्रीमधून आलेल्या हितेशला समाजासाठी काहीतरी करायचं होतं. त्यामुळे त्यांनी आपसाठी डिजिटल कॅम्पेन सुरू केलं. हितेश यांच्या मजेशीर कंटेन्टनं आपच्या कॅम्पेन आणखीनच मजेशीर बनवल्या. कंटेन्ट रायटिंगपासून एडिटिंगपर्यंत त्यांनी जबाबदारी हाताळली. हितेश यांनी याआधी 'एआयबी'मध्ये मीम बनवण्याचं काम पाहिलंय तसंच 'फिल्टर कॉपी'मध्ये मीडिया टीमचे हेड म्हणून त्यांनी जबाबदारी सांभाळलीय. आश्वती मुरलीधरन २००९ साली अरविंद केजरीवाल यांच्या आरटीआय आंदोलना दरम्यान केजरीवाल यांच्याशी संपर्क आलेल्या आश्र्वती या इंडिया अगेन्स्ट करप्शन आंदोलनातही त्यांच्यासोबत राहिल्या. निवडणुकी दरम्यान मुख्यमंत्री केजरीवाल यांच्यासाठी टाऊनहॉल प्रोग्रामचं व्यवस्थापन आश्वती यांनीच पाहिलं. मास कम्युनिकेशनचं शिक्षण घेतलेल्या आश्वतीनं कार्यकर्त्यांच्या व्यवस्थापनासोबतच जनसभांच्या देखरेखीचीही जबाबदारी पेलली.
