हैदराबाद चीनसह संपूर्ण जगभरात आतापर्यंत १ हजाराहून अधिक बळी घेतलेल्या 'करोना व्हायरस'मुळे सर्वसामान्यांमध्ये भीतीचं वातावरण निर्माण झालं आहे. आंध्र प्रदेशात तर एका ५० वर्षीय व्यक्तीने 'व्हायरल फिव्हर'ला 'करोना'चा ताप समजून आत्महत्या केल्याचा धक्कादायक प्रकार उघडकीस आला आहे. आपल्या पत्नी आणि मुलांमध्ये 'करोना'चे संक्रमण होऊ नये यासाठी या व्यक्तीने आत्महत्येचं पाऊल उचलल्याचं सांगण्यात येत आहे. हैदराबादमधील चित्तूर येथील रहिवासी असलेल्या कृष्णा यांचे शरीर गेल्या काही दिवसांपासून तापाने फणफणले होते. यात त्यांनी इंटरनेटवर 'करोना व्हायरस' संदर्भातील एक व्हिडिओ पाहिला होता. त्यानंतर आपल्याला याच व्हायरसची लागण झाली असल्याचं कृष्णा यांना वाटू लागलं होतं. कुटुंबियांना घरात बंद करुन ते स्मशानात त्यांच्या आईच्या कबरीजवळ निघून गेले. कुटुंबियांनी आरडाओरड करत शेजाऱ्यांच्या मदतीने घराचा दरवाजा उघडला आणि थेट स्मशान गाठलं. पण तोवर बराच उशीर झाला होता. कृष्णा यांनी त्यांच्या आईच्या कबरीजवळ असलेल्या एका झाडावर गळफास घेऊन आत्महत्या केली होती. डॉक्टरांनी कृष्णा यांच्या पार्थिवाचं शवविच्छेदन केल्यानंतर वैद्यकीय अहवालात त्यांच्या शरिरात 'करोना व्हायरस'ची कोणतीही लक्षणं आढळून आली नाहीत. कृष्णा यांना केवळ 'व्हायरल फिव्हर' होता असं डॉक्टरांनी सांगितलं. आंध्र प्रदेशात आतापर्यंत 'करोना व्हायरस'शी संदर्भात एकही रुग्ण आढळलेला नाही.
