नाशिक: पखाल रोड येथील ७३ वर्षीय करोनाबाधित रुग्णाचा जिल्हा रुग्णालयात रात्री उशिरा मृत्यू झाला. त्यामुळे शहरातील करोनाबाधित रुग्णांच्या मृत्यूची संख्या आठवर पोहचली आहे. शहरात आणखी एकाला करोनाचा संसर्ग झाल्याचं स्पष्ट झालं आहे. पंचवटीतील महालक्ष्मी थिएटरजवळील रुग्णाच्या संपर्कातील २५ वर्षीय युवक करोनाधित असल्याचा अहवाल प्राप्त झाला आहे. आता शहरातील बाधितांची संख्या १२९ इतकी झाली आहे. दरम्यान, नाशिकला करोना विषाणूच्या साखळीचा घट्ट विळखा बसला आहे. मंगळवारी रात्री नव्याने १७ रुग्णांची नोंद झाली. त्यामुळे जिल्ह्यातील बाधित रुग्णांची संख्या ही हजारच्या वर पोहोचली आहे. तर शहरातील एकूण रुग्णसंख्या १२८ झाली आहे. दरम्यान, मंगळवारी नाशिकमध्ये पाच जणांचा मृत्यू झाला आहे. जिल्ह्यातील मृतांची संख्या ५७ झाली आहे. शहरात २, चांदवड आणि मालेगाव तालुक्यात प्रत्येकी १, तर मालेगाव शहरातही १ मृत्यू झाला आहे. मंगळवारी रात्री जिल्ह्यात १७ रुग्ण नव्याने बाधित आढळून आले. यापैकी १२ रुग्ण नाशिक शहरातील आहेत. दिंडोरी रोड, पंडितनगर सिडको, पखाल रोड, वडाळागाव, श्रीरामनगर जत्रा हॉटेल, कॅनॉलरोड (नाशिकरोड), तृप्तीनगर टाकळी रोड, क्रांतीनगर (पंचवटी), हनुमाननगर या परिसरात बाधित रुग्ण आढळून आले आहेत. तीन रुग्ण ग्रामीण भागात आढळले असून, ते देशवनडीत (ता. सिन्नर) येथील आहेत.
