मुंबई : जागतिक अर्थव्यवस्था पूर्वपदावर येत आहे. स्थानिक बाजारात परदेशी गुंतवणूकदार मोठ्या प्रमाणात खरेदी करत आहेत. त्यामुळे निफ्टीची तेजी यापुढे कायम राहील, असे एचडीएफसी सिक्युरिटीजचे नागराज शेट्टी यांनी सांगितले. मंगळवारी अमेरिकन बाजारात घसरण झाली. अमेरिकेत करोनाची दुसरी लाट येण्याची शक्यता आहे. त्याचे पडसाद शेअर बाजारांवर उमटले. मोतीलाल ओसवाल फायनान्शिअल सर्व्हिसेसचे चंदन तपारिया यांच्या मते निफ्टी १०३३३ च्या स्तरापासून पुढे झेप घेईल. १०६०० ते १०६५० हा त्याचा पुढील टप्पा राहील. तर घसरण झाली तर १०२५० ते १०२८० अंकांच्या दरम्यान मर्यादित राहील, असे त्यांनी सांगितले. सध्या बाजारात खरेदीस पोषक वातावरण आहे. अमेरिकेसह जवळपास ८१ देशांमध्ये करोनाची दुसरी लाट येण्याची भीती जाणकारांनी व्यक्त केली आहे. लडाखमधील सीमेवर भारत आणि चीनमधील निर्माण झालेल्या तणावामुळे गुंतवणूकदारांनी मध्यम कालावधीसाठी गुंतवणूक करण्याचा सल्ला जिओजित फायनान्शिअल सर्व्हिसेसचे विनोद नायर यांनी दिला. अमेरिकेतील भांडवली बाजारात नकारात्मक वातावरण असल्याने त्याचे पडसाद स्थानिक बाजारावर उमटतील. जर वरच्य पातळीवर घसरण झाली तर गुंतवणूकदारांनी गुंतवणुकीची घाई करु नये, असा सल्ला कोटक सिक्युरिटीजचे श्रीकांत चौहान यांनी दिला. जागतिक भांडवल बाजारांत मंगळवारी सकारात्मक वातावरण दिसून आले. त्याचेही प्रतिबिंब या दोन्ही शेअर बाजारांत दिसले. सेन्सेक्सच्या ३० कंपन्यांमध्ये लार्सन अॅण्ड टुब्रोचा समभाग ७ टक्के वधारला. त्यापाठोपाठ बजाज फायनान्स, इंडसइंड बँक, एनटीपीसी, पॉवरग्रीड, महिंद्र अॅण्ड महिंद्र आणि अॅक्सिस बँकेचेसमभाग वधारले. त्याचवेळी रिलायन्स इंडस्ट्रीज, भारती एअरटेल व मारुती या कंपन्यांच्या समभागांना तोटा सहन करावा लागला. जिओजित फायनान्शियल सर्व्हिसेसच्या संशोधन विभागाचे प्रमुख विनोद नायर यांच्या मते, बाजारात सातत्याने तरलता असल्यामुळे बाजार सकारात्मक राहिला. कोविड-१९ संसर्ग झालेल्या रुग्णांमध्ये बरे होण्याचे वाढते प्रमाण आणि भारत-चीन सीमेवरील जरा निवळू लागलेला तणाव यामुळेही बाजार वधारला. विदेशी गुंतवणूकदार संस्थांनी ४२४.२१ कोटींचे समभाग सोमवारी खरेदी केले. भारतीय रुपया मंगळवारी ३७ पैशांनी सक्षम होत ७५.६६ रुपयांवर बंद झाला. युरोपमधील भांडवल बाजार वरच्या स्तरावर व्यवसाय करत होते. तसेच आंतरराष्ट्रीय तेल बाजारात ब्रेन्ट कच्च्या खनिज तेलाचा दर १.३७ टक्क्यांनी वाढत प्रति बॅरल ४३.६७ डॉलर इतका झाला.
