मुंबई : आज मल्टी कमॉडिटी एक्सचेंज (MCX) उघडताच सोन्याच्या दरात घसरण झाली. सोन्याचा भाव २५६ रुपयांनी कमी झाला आहे. सध्या सोने १० ग्रॅमला ४७३११ रुपयांवर ट्रेड करत आहे. चांदीच्या दरात देखील ४३२ रुपयांची घसरण झाली आहे. सध्या MCX वर चांदीचा भाव ४७८९८ रुपये प्रती किलो आहे. दरम्यान मंगळावारी दिल्लीतील सराफा बाजारात सोने ७६१ रुपयांनी महागले. सोन्याचा भाव ४८४१४ रुपयांपर्यंत वाढला होता. जागतिक बाजारातील तेजीने सोन्याच्या दरात वाढ झाली. चांदीचा भाव १३०८ रुपयांनी वाढून तो ४९२०४ रुपये झाला होता. काल जागतिक कमॉडिटी बाजारात सोने दर १७२७.७० डॉलर प्रती औंस होता. चांदीचा भाव ०. टक्क्यांनी वाढून १७.५४ डॉलर प्रती औंस झाला. देशात करोनाबाधितांची संख्या झपाट्याने वाढत आहे. कोव्हीड-१९ ने आतापर्यंत ३.५ लाख नागरिकांना बाधा केली आहे. तर या महामारीने मृतांचा आकडा १० हजारांच्या नजिक पोहचला आहे. त्याशिवाय करोनाने अर्थव्यवस्थेचे मोठे नुकसान केलं आहे. www.goodreturns.in या वेबसाइटनुसार आज बुधवारी मुंबईत २२ कॅरेट सोन्याचा भाव ४६११० रुपये झाला आहे. २४ कॅरेट सोने आज ४७००० रुपये झाले आहे. चांदीचा दर प्रती किलो ४७११० रुपये आहे. त्यात १० रुपयांची वाढ झाली. दिल्लीत आजचा २२ कॅरेट सोन्याचा भाव ४६०१० रुपये झाला आहे. २४ कॅरेटसाठी ४७२१० रुपये आहे. कोलकात्यात आज सोने २२ कॅरेटसाठी ४६७५० रुपये असून २४ कॅरेटचा भाव ४८०४० रुपये आहे. तर चेन्नईत २२ कॅरेटचा भाव ४५५४० रुपये आणि २४ कॅरेटचा भाव ४९६८० रुपये झाला आहे. अमेरिकेतील रोजगाराची ताजी आकडेवारी आणि करोनाचा प्रकोप बघता फेडरल रिझर्व्हकडून व्याजदर जैसे थेच ठेवले आहेत. त्यामुळे तेथील भांडवली बाजारांवर दबाव वाढला आहे. त्यातच चीनमध्ये करोनाने पुन्हा डोकं वर काढलं. परिणामी गुंतवणूकदार धास्तावले. सोमवारी अमेरिकेतील भांडवली बाजारात घसरण झाली होती. यापूर्वीच फेरडल रिझर्व्हने व्याजदर कपात करून तो शून्यवर आणला होता. आता करोनामुळे झालेले नुकसान भरून काढण्यासाठी बँकेकडून पॅकेज जाहीर केले जाण्याची शक्यता आहे. त्यामुळे कमॉडिटी बाजारात मौल्यवान धातूंवर दबाव निर्माण झाल्याचे बोलले जात आहे.
