नवी : कर्जाच्या ओझ्याखाली दबलेल्या एका उद्योजकानं स्वतःच्याच हत्येची सुपारी दिल्याचं पोलीस तपासात उघड झालं आहे. ९ जून रोजी पटपडगंजमधून बेपत्ता झालेले उद्योजक गौरव बन्सल यांचा मृतदेह रणहौला येथे एका झाडाला लटकलेल्या अवस्थेत आढळून आला. पोलिसांनी या हत्येचं गूढ उकललं असून, या प्रकरणात एका अल्पवयीन आरोपीसह चौघांना अटक केली आहे. पोलिसांच्या दाव्यानुसार, उद्योजक बन्सल हे कर्जात बुडालेले होते. त्यांनी कोट्यवधी रुपयांचा विमा होता. आपली हत्या झाली तर, विम्याची रक्कम कुटुंबीयांना मिळेल असं त्यांना वाटलं. सोशल मीडियावर ओळख झालेल्या एका अल्पवयीन मुलाला त्यांनी स्वतःच्या हत्येची सुपारी दिली. त्यानं तीन साथीदारांची मदत घेतली. ठरल्याप्रमाणं बन्सल रणहौला येथे पोहोचले. तेथे एकानं त्यांचे हात बांधले आणि इतरांनी त्यांची हत्या करून मृतदेह झाडाला लटकवला. बन्सल यांनी हत्या करण्यासाठी आरोपींना ९० हजार रुपये दिले होते, अशी माहिती समोर आली आहे. मनोज कुमार यादव (वय २१, भाजीविक्रेता), सूरज उर्फ सीपी (वय १८, विद्यार्थी) आणि सुमित कुमार (वय २६, टेलर) अशी या हत्या प्रकरणात अटक केलेल्या आरोपींची नावे आहेत. सर्व आरोपी मोहन गार्डन परिसरात राहणारे आहेत. तत्पूर्वी, एका व्यक्तीचा मृतदेह झाडाला लटकलेल्या अवस्थेत आढळून आल्याची माहिती १० जून रोजी पोलिसांना मिळाली होती. पोलीस तपासात तो मृतदेह बन्सल यांचा असल्याची माहिती मिळाली. हत्येचा गुन्हा दाखल करण्यात आला होता. पोलिसांनी तपासाची चक्रे वेगाने फिरवून सूरजला संशयित म्हणून ताब्यात घेतलं. त्यानं हत्येची कबुली दिली आणि साथीदारांची नावंही सांगितली. अल्पवयीन आरोपीनं सांगितलं की, काही दिवसांपूर्वी सोशल मीडियावरून बन्सल यांच्या संपर्कात आलो. त्यानंतर त्यांनीच स्वतःच्या हत्येची सुपारी दिली. सूत्रांच्या माहितीनुसार, बन्सल यांचा एक ते दीड कोटी रुपयांचा विमा आहे. व्हॉट्सअॅपवर पाठवला स्वतःचाच फोटो व्यवसायात तोटा होत असल्यानं काही दिवसांपासून बन्सल यांना नैराश्य आलं होतं. बेपत्ता होण्यापूर्वी त्यांनी आपल्या फोनवरून अल्पवयीन आरोपीशी संपर्क साधला होता. ते कार घरी ठेवून अन्य वाहनानं रणहौलाला पोहोचले. व्हॉट्सअॅपवर स्वतःचा फोटो आरोपींना पाठवला. रणहौला पोहोचल्यानंतर आरोपींनी त्यांचे हात बांधले. गळ्यात फास अडकवून त्यांना झाडाला लटकवले, अशी माहिती पोलिसांनी दिली.
