मुंबई: ‘’मध्ये मुख्य उपसंपादकपदाची जबाबदारी दीर्घ काळ सांभाळणारे अभ्यासू पत्रकार यांचे सोमवारी रात्री अकस्मात निधन झाले. ते ४९ वर्षांचे होते. त्यांच्या पश्चात पत्नी व मुलगी असा परिवार आहे. आंबेरकर यांच्या निधनाने ‘महाराष्ट्र टाइम्स’ परिवार तसेच पत्रकारिता वर्तुळात शोक व्यक्त होत आहे. गोरेगावच्या सामना सोसायटीत राहणारे अतुल आंबेरकर यांनी सोमवारी दुपारी नेहमीप्रमाणे ऑफिसचे काम घरून सुरू केले. संध्याकाळी उशिरापर्यंत रोजच्या कामाबाबत अनेक सहकाऱ्यांशी त्यांचे दूरध्वनीवरून बोलणे झाले, तसेच मेसेजेसची देवाणघेवाणही झाली. मात्र रात्री अचानक त्यांची प्रकृती ढासळली. त्यांना जोगेश्वरी ट्रॉमा सेंटर येथे हलविण्यात आले; मात्र त्यांची प्राणज्योत मालवली. दैनिक 'सामना'मध्ये काही वर्षे पत्रकारिता केल्यानंतर आंबेरकर हे ‘महाराष्ट्र टाइम्स’मध्ये मुख्य उपसंपादकपदावर रुजू झाले. ‘मटा’च्या पान क्रमांक एकची जबाबदारी त्यांनी दीर्घकाळ अतिशय कौशल्याने सांभाळली. आकर्षक मथळे देणे, बातम्यांचे ‘वजन’ अचूक जोखणे ही त्यांच्या कामाची प्रमुख वैशिष्ट्ये होती. वाहनउद्योगातील अद्ययावत माहिती जाणून घेणे, त्यातील नवनवे ट्रेंड अभ्यासणे हे त्यांच्या आवडीचे प्रमुख विषय होते. त्यावर त्यांनी लिखाणही केले. राष्ट्रीय आंतरराष्ट्रीय विषयांवरील प्रासंगिक लिखाणही ते करीत असत. आंबेरकर यांचे शालेय शिक्षण डोंबिवलीतील टिळकनगर विद्यामंदिरात, तर कॉलेज शिक्षण पेंढारकर महाविद्यालयात झाले. त्यांचे वडील विठ्ठल आंबेरकर यांनी ‘महाराष्ट्र टाइम्स’मध्ये मुद्रितशोधन विभागप्रमुख म्हणून जबाबदारी सांभाळली होती. वडिलांच्या या पार्श्वभूमीमुळे आंबेरकर यांच्यात वाचन, लिखाणाची रुची निर्माण झाली व ते पत्रकारिता क्षेत्रात प्रवेश करते झाले. पत्रकार सुशील आंबेरकर हे अतुल यांचे बंधू होत.
