मुंबई : स्थानिक कमॉडिटी बाजारात बुधवारी सोन्याचं किमती ०.४ टक्क्यांनी वधारून ४८४२० रुपयांवर गेल्या. कमॉडिटी बाजारातला हा आतापर्यंतचा सार्वकालीन उच्चांकी दर ठरला आहे. याआधी ४८२८९ रुपयांचा रेकॉर्ड होता. चांदीमध्ये मात्र घसरण झाली असून चांदीचा एक किलोचा भाव ४८७१६ रुपये आहे. आजच्या सत्रात देखील सोने तेजीत राहण्याची शक्यता जाणकारांनी व्यक्त केली आहे. जागतिक बाजारात मंगळवारी स्पॉट गोल्ड (SpotGold) ०.२ टक्क्याने वाढून १७६९.५९ डॉलर प्रती औंस झाले. २०१२ नंतरची जागतिक बाजारातील सोन्याची सर्वाधिक किंमत आहे. यापूर्वी २०१२ मध्ये १७७३ डॉलर प्रती औंस इतकी होती. आर्थिक पॅकेजच्या पार्श्वभूमीवर सोन्याच्या किमतीत चालू वर्षात १६ टक्के वाढ झाली आहे. करोनाची दुसरी लाट येण्याची शक्यता असल्याने बड्या देशांमधील केंद्रीय बँकांनी अर्थव्यवस्थेला सावरण्यासाठी आर्थिक पॅकेजची तयारी सुरु केली आहे. परिणामी भांडवली बाजारातील संस्थात्मक गुंतवणूकदारांमध्ये भीतीचे वातावरण आहे. त्यांनी गुंतवणुकीची स्ट्रॅटेजी बदलली आहे. संस्थात्मक गुंतवणूकदार मौल्यवान धातूला गुंतवणुकीसाठी पसंत करत आहेत. महागाई आणि चलनातील अवमूल्यनाला हेजिंगचा भक्कम पर्याय म्हणूनदेखील सोने गुंतवणूकदारांना वरदान ठरत आहे. वाचा : goodreturns.in या वेबसाईटनुसार आज बुधवारी मुंबईत २२ कॅरेट सोन्याचा भाव ४७७१० रुपये आहे. २४ कॅरेटचा भाव ४४४१० रुपये झाला आहे. दिल्लीत २२ कॅरेट सोनं ४७०६० रुपये आणि २४ कॅरेटचा भाव ४८२६० रुपये आहे. कोलकात्यात २२ कॅरेटचा भाव ४७७५० रुपये आणि २४ कॅरेटचा भाव ४९०४० रुपये आहे. चेन्नईत २२ कॅरेट सोन्याचा भाव ४६३६० रुपये आहे. २४ कॅरेटचा भाव ५०५७० रुपये झाला आहे. करोना व्हायरसने पुन्हा एकदा पाश्चिमात्य देशांत डोकं वर काढले आहे. चीनची राजधानी बीजिंगमध्ये करोनाचे रुग्ण आढळून आले आहेत. जागतिक आरोग्य संघटनेच्या (WHO) ताज्या अहवालानुसार उत्तर अमेरिका दक्षिण अमेरिकेत करोनाचे रुग्ण झपाट्याने वाढले आहेत. त्यामुळे करोनाची दुसरी लाट येण्याची शक्यता जाणकार व्यक्त करत आहेत. तसे झाले तर जागतिक बाजारपेठेत सोन्याचा भाव १८०० डॉलरपर्यंत वाढतील असा अंदाज व्यक्त करण्यात येत आहे. सोने खरेदीमध्ये भारत हा जगातील मोठ्या ग्राहक देशांपैकी एक आहे. वर्ल्ड गोल्ड कौन्सिलच्या अंदाजानुसार भारतीयांकडे २२००० ते २५००० टन सोने आहे. त्यापैकी ६५ टक्के सोने हे ग्रामीण भारतात आहे. या अवाढव्य सोन्यापैकी केवळ १.२ टक्के सोने गहाण ठेवण्यात आले आहे. त्यामुळे गोल्ड लोन व्यवसायात प्रचंड संधी असल्याचे जाणाकरांचे म्हणणे आहे.
