मुंबई : भांडवली बाजारातील प्रतिथयश आणि अनुभवी गुंतवणूकदार म्हणून ओळख असलेल्या राकेश झुनझुनवाला ( alleged for ) यांच्यावर इन्सायडर ट्रेडिंगचा ठपका ठेवण्यात आला आहे. या प्रकरणाची गंभीर दखल घेत भांडवली बाजार नियंत्रक सेबीने झुनझुनवाला आणि त्यांच्या कुटुंबीयांना चौकशीसाठी नोटीस बजावली आहे. राकेश झुनझुनवाला हे भारतातील वॉरेन बफे म्हणून ओळखले जातात. ब्लूमबर्ग संस्थेच्या अंदाजानुसार झुनझुनवाला जवळपास १२ हजार कोटींचे मालक आहेत. मात्र त्यांच्यावर आता सेबीने इन्सायडर ट्रेडिंगचा (Insider Trading)आरोप केला आहे. याआधीही जानेवारीमध्ये सेबीने झुनझुनवाला आणि त्यांच्या कुटुंबीयांची चौकशी केली होती. अॅप्टेक कंपनीच्या शेअर खरेदी प्रकरणी राकेश झुनझुनवाला यांनी इन्सायडर ट्रेडिंग करून बक्कळ कमाई केल्याचा संशय सेबीने व्यक्त केला आहे. या प्रकरणाची जानेवारीपासून सेबी चौकशी करत आहे. झुनझुनवाला यांच्या पोर्टफोलिओमध्ये अॅप्टेक ही एकमेव कंपनी आहेत ज्यात झुनझुनवाला यांच्याकडे व्यवस्थापनाचे अधिकार आहेत. त्यामुळे सेबीने आता तपासाचा वेग वाढवला आहे. या प्रकरणी झुनझुनवाला यांच्यासह पत्नी रेखा , त्यांचा भाऊ राजेशकुमार आणि बहीण तसेच सासू यांची चौकशी करण्यात आल्याची माहिती सूत्रांनी दिली आहे. याशिवाय रमेश दमानी आणि मधु जयकुमार यांचीही चौकशी करण्यात आली आहे. मे २०१६ ते ऑक्टोबर २०१६ या कालावधीत अॅप्टेक शेअर्समधील झालेल्या प्रत्येक व्यवहाराची (share trading) सेबीने कसून चौकशी सुरू केली आहे. झुनझुनवाला यांना आणि त्यांच्या कुटुंबीयांना अॅप्टेकच्या भविष्यातील योजना, आर्थिक स्थिती यासारख्या गोपनीय गोष्टींची आधीच माहिती मिळवली होती. त्याआधारे त्यांनी शेअर बाजारात ट्रेडिंग करून जबरदस्त नफा कमावला असा आरोप सेबीने झुनझुनवाला कुटुंबियांवर केला आहे. या प्रकरणात सेबीने अॅप्टेककडून माहिती मागवली आहे. झुनझुनवाला यांना नियंत्रकाच्या पूर्वपरवागीशिवाय संचालकपद का बहाल केले, असा प्रश्न सेबीने अॅप्टेक व्यव्स्थापनासमोर उपस्थित केला आहे. या प्रक्रात झुनझुनवाला दोषी आढळ्यास त्यांची बँक खाती आणि डिमॅट खाती गोठवण्याची कारवाई सेबीकडून केली जाईल, असा अंदाज जाणकारांनी व्यक्त केला आहे. झुनझुनवाला यांनी २००५ मध्ये अॅप्टेक कंपनीच्या शेअरमध्ये मोठ्या प्रमाणात गुंतवणूक केली होती. मात्र यात इन्सायडर ट्रेडिंग झाल्याचा संशय सेबीने व्यक्त केला आहे. २००५ मध्ये झुनझुनवाला यांनी अॅप्टेक कंपनीचा शेअर ५६ रुपयांना खरेदी केला होता. टप्याटप्यात त्यांनी कुटुंबियांच्या इतर सदस्यांच्या नावे ४९ टक्के शेअर खरेदी केले. यातून या शेअरचे बाजारमूल्य ६९० कोटी झाले. २३ जानेवारी रोजी झुनझुनवाला यांची बहीण सुधा गुप्ता यांची चौकशी करण्यात आली. रेअर एंटरप्राइसचे मुख्य कार्यकारी अधिकारी आणि अॅप्टेक कंपनीचे संचालक उत्पल सेठ यांची बहीण उष्मा सेठ सुळे यांची चौकशी करण्यात आली आहे.
