मुंबई : देशातील इंधन दर जागतिक बाजाराशी सलग्न करण्यात आले आहेत. त्यामुळे दररोज सकाळी ६ वाजता कंपन्या पेट्रोल आणि डिझेलचा भाव निश्चित करतात. सध्या जागतिक बाजारातला क्रूडचा भाव ४० डाॅलरच्या आसपास असल्याने देशातील पेट्रोल आणि डिझेल महागच आहे. त्यात केंद्र आणि राज्य सरकारचा कर लादलेला आहे. कंपन्यांना आता इंधन दरात कपात करावी अशी मागणी केली जात आहे. पेट्रोल आणि डिझेल दरवाढीवर गेल्या आठवड्याच्या सुरुवातीला देशभरात आंदोलन करण्यात आले. त्यानंतर कंपन्यांनी आठवडाभर इंधन दर स्थिर ठेवले होते. दरम्यान, जागतिक बाजारात देखील क्रूड ऑइलचा भाव ४० डॉलर्सच्या आसपास स्थिर आहे. त्यामुळे आज कंपन्यांनी डिझेल दरवाढ केल्याने ग्राहकांमध्ये पुन्हा संतापाचे वातावरण आहे. माल वाहतूक आणि सार्वजनिक वाहतूक व्यवस्था मोठ्या प्रमाणात डिझेलचा वापर करते. डिझेल दरवाढीने यापूर्वीच माल वाहतूकदारांचे कंबरडे मोडले असून रिक्षा आणि टॅक्सी चालकांना दरवाढीचे संकेत दिले आहेत. दरम्यान, इंधन दरवाढीने महागाईचा भडका उडण्याची शक्यता आहे. इंडियन ऑइलच्या दर पत्रकानुसार मंगळवारी मुंबईत पेट्रोलचा भाव प्रती लीटर ८७.१९ रुपयांवर कायम आहे. तर डिझेल २२ पैशांनी महागले असून प्रती लीटर भाव ७९.०५ रुपये झाला आहे. मंगळवारी तो ७८.८३ रुपये होता. राजधानी दिल्लीत पेट्रोलचा भाव ८०.४३ रुपयांवर स्थिर आहे. डिझेलचा भाव ८०.७८ रुपये प्रती लिटर झाला आहे. चेन्नईत पेट्रोल ८३.६३ रुपये आणि कोलकात्यात ८२.१० रुपये आहे. चेन्नईत डिझेल ७७.९१ रुपये आणि कोलकात्यात ७५.८९ रुपयांपर्यंत वाढले आहे. वाचा : लॉकडाउन शिथिल केल्यानंतर सार्वजनिक वाहतुकील परवानगी देण्यात आली आहे. त्यामुळे गेल्या महिन्यात पेट्रोल आणि डिझेलची मागणी वाढली. जूनमध्ये ११.८ दशलक्ष टन पेट्रोलियम उत्पादनांची विक्री झाली आहे. हे प्रमाण आता टाळेबंदी पूर्व स्थितीवर आले आहे. जूनमध्ये पेट्रोलचा खप ८५ टक्के तर डिझेलचा खप ८२ टक्के झाला. जून २०१९ मध्ये १३.४ दशलक्ष टन पेट्रोलियम उत्पादनांची विक्री झाली होती. तेल वितरक कंपन्यांनी ७ जूनपासून दरवाढीचा सपाटा लावला होता. यावर नागरिकांमध्ये संतापाची लाट होती. याशिवाय विरोधी पक्षांनी सरकारविरोधात आंदोलनाची हाक दिली होती. गेल्या आठवड्या पेट्रोल डिझेल दरवाढीविरोधात रस्त्यावर आंदोलने झाली. गेल्या सोमवारी कंपन्यांनी पेट्रोल आणि डिझेलमध्ये शेवटची दरवाढ केली होती. त्यानंतर सलग सात दिवस इंधन दर स्थिर ठेवले आहेत. याआधी गेल्या सोमवारी पेट्रोलमध्ये ५ पैसे आणि डिझेलमध्ये १३ पैसे वाढ केली होती.
