वसई: मुंबईपासून जवळच असलेल्या वसईत एक धक्कादायक प्रकार उघडकीस आला आहे. मुलगा शारिरीक आणि मानसिक छळ करत असल्याची तक्रार ८० वर्षांच्या आईने पोलिसांत दिली आहे. तसेच लॉकडाउनच्या काळात मार्चपासून तो माझ्या पेन्शनचे पैसे लाटत आहे, असे तिने तक्रारीत म्हटले आहे. आईचं आपल्या मुलांवर जीवापाड प्रेम असते. स्वतःच्या सर्व आवडी-निवडी बाजूला ठेवून ती आपल्या मुलांसाठी राबत असते. मुले मोठी झाली की, ते या आईला दूर ढकलतात. त्यांना आई नकोशी होते. अशीच एक घटना मुंबईहून जवळच असलेल्या परिसरात उघडकीस आली आहे. ८० वर्षांच्या आईने आपल्या मुलाविरोधात पोलिसांत तक्रार दाखल केली आहे. मुलगा आपला शारिरीक आणि मानसिक छळ करत असल्याचे तिने तक्रारीत म्हटले आहे. मार्चमध्ये लॉकडाउन लागू झाल्यापासून मुलाने आपल्याकडील बँकेचे एटीएम हिसकावून घेतले आहे. माझ्या पेन्शनचे पैसे तो बँकेतून काढत आहे. मला मारहाण आणि माझा छळ करत आहे, असे तिने तक्रारीत म्हटले आहे. मिळालेल्या माहितीनुसार, कमलिनी कांबळे यांनी मानिकपूर पोलीस ठाण्यात फोनवरून ही तक्रार केली. त्यानंतर पोलीस घरी आले. त्यांनी सगळी माहिती घेऊन मुलगा शिरीष याच्याविरोधात गुन्हा दाखल केला आहे. अद्याप मुलाला अटक केली नाही. लॉकडाउन लागू झाल्यानंतरच्या काळात लहान मुलाकडून मला त्रास दिला जात आहे. त्याची नोकरी गेली आहे. तो बेरोजगार झाला. मला महिन्याला ९ हजार रुपये पेन्शन मिळते. त्या पैशांवर तो डोळा ठेवून असतो, असेही तिने म्हटले आहे. कमलिनी कांबळे यांच्या पतीचे २००१मध्ये निधन झाले आहे. ते सरकारी कर्मचारी होते.
