वॉशिंग्टन: अमेरिकेचे राष्ट्राध्यक्ष डोनाल्ड ट्रम्प यांनी करोना आजारावर केलेल्या पोस्टवर फेसबुक आणि ट्विटरने कारवाई केली आहे. ट्रम्प यांच्यावर सध्या करोनाच्या आजारावर व्हाइट हाउसमध्येच उपचार सुरू आहेत. ट्रम्प यांनी करोनाचा आजार हा तापाचा आजार असल्याची पोस्ट केली होती. सोशल मीडिया प्लॅटफॉर्मने ट्रम्प यांची पोस्ट चुकीची माहिती असल्याच्या श्रेणीत टाकली होती. रॉयटर्स या वृत्तसंस्थेसोबत बोलताना फेसबुकच्या प्रवक्त्याने म्हटले की, कोविड-१९ चे गांभीर्य लक्षात घेता आम्ही चुकीची माहिती हटवली आहे. अमेरिकेच्या राष्ट्राध्यक्षांच्या पोस्टबाबत अशी कारवाई होणे ही दुर्मिळ बाब आहे. ट्विटरनेदेखील अशा प्रकारे ट्रम्प यांच्या एका ट्विटवर इशारा देणारी सूचना पोस्ट केली आहे. कोविड-१९वर चुकीची माहिती देऊन नियमांचे उल्लंघन करण्यात आले असल्याचे ट्विटरने म्हटले. ट्रम्प यांनी तापाची साथ ही करोनापेक्षा अधिक घातक असल्याचे ट्रम्प यांनी म्हटले होते. अमेरिकेत २०१९-२०२०मध्ये फ्लूमुळे २२ हजारजणांचा मृत्यू झाला आहे. तर, करोनाच्या संसर्गामुळे दोन लाख १० हजारजणांचा मृत्यू झाला आहे. वाचा: डोनाल्ड ट्रम्प यांच्या निवडणूक प्रचाराच्या प्रवक्त्यांनी म्हटले की, सिलिकॉन व्हॅली आणि प्रमुख माध्यमांनी आपल्या व्यासपीठाचा वापर कायम भीती विकण्यासाठी आणि आपला अजेंडा पूर्ण करण्यासाठी केला आहे. आता डोनाल्ड ट्रम्प यांना लक्ष्य करण्यात येत आहे. करोनाविरोधातील लढाईत हेच होत असल्याचे त्यांनी म्हटले. वाचा: ट्रम्प यांच्या पोस्टवर याआधीदेखील फेसबुक आणि ट्विटरने कारवाई केली होती. ऑगस्ट महिन्यात ट्रम्प यांनी करोनाबाबत केलेल्या एका वक्तव्याचा व्हिडिओ हटवला होता. या व्हिडिओत करोना व्हायरसचा परिणाम लहान मुलांवर होत नसल्याचा दावा केला होता. त्यावेळी फेसबुककडून पहिल्यांदाच डोनाल्ड ट्रम्प यांच्या करोनाबाबतच्या पोस्टवर कारवाई करण्यात आली. ट्रम्प यांनी पोस्ट केलेला व्हिडिओ खोटे दावे करत असून त्यामध्ये कोणत्याही प्रकारचे तथ्य नाही. कोणत्याही व्यक्तीमध्ये करोनाशी पूर्णपणे लढण्याची क्षमता विकसित झाली नाही. त्यामुळे हा व्हिडिओ आमच्या नियमांविरोधात असल्यामुळे व्हिडिओ हटवला असल्याची माहिती फेसबुकच्या प्रवक्त्यांनी दिली होती. वाचा: ट्विटरनेदेखील ट्रम्प यांच्या काही ट्विटवर कारवाई केली होती. त्यामुळे ट्रम्प आणि ट्विटर यांच्यात वाद निर्माण झाले होते. वर्णद्वेषविरोधी आंदोलन सुरू असताना ट्रम्प यांनी केलेल्या एका ट्विटवर ट्विटरने कारवाई केली होती.
