मुंबई : इंस्टग्रामवर परदेशी असल्याचे भासविणाऱ्या तरुणीच्या हनी ट्रॅपमध्ये गिरगावमधील चांगलाच अडकला. भारतामध्ये सोन्याच्या दागिन्यांचा व्यवसाय करायचा असल्याचे सांगून या तरुणीने अमेरिकन डॉलर्सचे पार्सल पाठविले. हे पार्सल विमानतळावरून सोडविण्याच्या नादात डायमंड ब्रोकरने तब्बल एक कोटी १६ लाख रुपये गमावले. चार ते पाच कोटींचा फायदा होईल या आशेने डायमंड ब्रोकर पैसे पाठवत गेला. सायबर भामट्यांनी वेगवेगळी कारणे सांगून इतकी मोठी रक्कम लांबविल्याने डायमंड ब्रोकरला धक्का बसला आहे. याप्रकरणी व्ही. रोड पोलिस ठाण्यात गुन्हा दाखल करण्यात आला आहे. गिरगाव येथे कटुंबीयासोबत राहणाऱ्या हितेश (बदललेले नाव) या डायमंड ब्रोकरचे वांद्रे-कुर्ला कॉम्प्लेक्स येथे कार्यालय आहे. १० ऑक्टोबरला ब्रोकरच्या इंस्टाग्रामवर अकाउंटवर ॲलेक्स झेंडरा या तरुणीच्या नावाने रिक्वेस्ट आली. हितेश याने रिक्वेस्ट स्वीकारतच दोघांमध्ये चांगली मैत्री झाली. मोबाइल क्रमांकाची देवाणघेवाण झाल्यानंतर दोघेही सोशल मीडियावर एकमेकांशी गप्पा मारू लागले. लंडन येथे खासगी जहाजावर कॅप्टन असल्याचे सांगणाऱ्या ॲलेक्स हिने तुझ्यावर प्रेम जडले असून, लग्न करण्याची इच्छा असल्याचे हितेशला सांगितले. विवाहित असूनही हितेश तिच्या बोलण्याला भुलून गेला. १७ ऑक्टोबरला ब्रडेड शुज, सोन्याच्या वेगवेगळ्या प्रकारच्या चेन, घड्याळ आणि अमेरीकेन डॉलर असलेला व्हिडीओ तिने व्हॉट्सअॅपवरून हितेशला पाठवला. तुला गिफ्ट म्हणून हे सर्व पाठवत असल्याचे तिने सांगितले. गिफ्ट पाठविण्यासाठी हितेश याने वांद्रे येथील कार्यालयाचा पत्ता दिला. करण्यासाठी पाच लाख डॉलर आणि ॲलेक्स हिने पाठविलेल्या गिफ्टची हितेश आतुरतेने वाट पाहत होता. दोन ते तीन दिवसांनी हितेशला माया छत्री नावाच्या महिलेने फोन केला. विमानतळ कस्टम विभागातून बोलत असल्याचे सांगून हे गिफ्ट फारच महागडे असल्याचे तिने सांगितले. सुमारे चार ते पाच कोटींच्या पार्सलसाठी तुम्हाला पार्सल चार्ज, टॅक्स चार्ज भरावा लागेल, असे ती म्हणाली. इतकी मोठी रक्कम मिळत असल्याने हितेशने तयारी दर्शवली आणि माया हिने दिलेल्या वेगवेगळ्या बँक खात्यावर टप्याटप्याने ६० लाख ४९ हजार रुपये ट्रान्सफर केले. प्रत्यक्षात डॉलरही दाखविले हितेश याच्याकडून सहज ६० लाख मिळाल्याने त्याचा विश्वास बसला म्हणून दिल्ली येथून कस्टम अधिकारी बोलतोय म्हणून आणखी एक कॉल आला. चार कोटींचे डॉलर रुपयांमध्ये रूपांतर करण्यासाठी आणखी वेगवेगळ्या फी आणि कर भरावे लागतील, असे सांगून हितेशला दिल्लीत बोलाविले. दिल्लीमध्ये एका नायजेरियन नागरिकाने हितेश याची हॉटेलमध्ये भेट घेतली आणि अॅलेक्स हिने पाठविलेले डॉलर दाखविले. हितेश याचा विश्वास बसला आणि पुन्हा त्याने वेगवेगळ्या खात्यांवर ५५ लाख ५० हजार रुपये पाठविले.
