मुंबई : जागतिक कमॉडिटी बाजारात ७० डॉलरवर गेल्यानंतर तेल आयातीचा बोजा वाढणार आहे. मात्र यापूर्वीच इंधन दरवाढीने पेट्रोल १०० रुपयांवर गेल्याने टीकेचे धनी बनलेल्या पेट्रोलियम कंपन्यांनी आज पुन्हा एकदा इंधन दरात कोणताही बदल केला नाही. देशातील पेट्रोलियम कंपन्यांनी आज मंगळवारी इंधन दर स्थिर ठेवले. पेट्रोल आणि डिझेल दरात सलग दहाव्या दिवशी कोणताही बदल झालेला नाही. त्यामुळे ग्राहकांना तूर्त दिलासा मिळाला आहे. इंधन दरवाढीवरून याआधीच केंद्र सरकारला विरोधकांनी लक्ष्य केलं आहे. सोमवारी संसदेच्या अधिवेशनात सरकारला विरोधकांनी घेरले होते. यामुळे संसदेचे कामकाज ठप्प झाले होते. नुकताच केंद्रीय निवडणूक आयोगाने पाच राज्यांच्या निवडणुका जाहीर केल्या आहेत. त्यामुळे कंपन्यांनी इंधन दराबाबत सावध भूमिका घेतली असल्याचे बोलले जाते. यापूर्वी ऑक्टोबर-नोव्हेंबरमध्ये बिहारमधील निवडणुकांमुळे तब्बल ४८ दिवस पेट्रोलियम कंपन्यांकडून इंधन दर स्थिर ठेवण्यात आले होते. पेट्रोलियम कंपन्यांनी आज मंगळवारी सलग दहाव्या दिवशी पेट्रोल आणि डिझेल दरात कोणताही बदल केला नाही. आज मंगळवारी मुंबईत पेट्रोल ९७.५७ रुपयांवर कायम आहे. एक लीटर डिझेलचा भाव ८८.६० रुपये आहे. दिल्लीत आज एक लीटर पेट्रोल ९१.१७ रुपये आहे. डिझेलचा भाव ८१.४७ रुपये आहे. चेन्नईत आजचा पेट्रोलचा भाव ९३.१७ रुपये झाला आहे. डिझेलसाठी ८६.४५ रुपये भाव आहे. कोलकात्यात आज पेट्रोल ९१.३५ रुपये झाले आहे. डिझेलचा भाव ८४.३५ रुपये झाला आहे. बंगळुरात पेट्रोल ९४.२२ रुपये असून डिझेल ८६.३७ रुपये झाला आहे. मध्य प्रदेशातील भोपाळमध्ये आतापर्यंतचा डिझेलचा सर्वाधिक ८९.७६ रुपयांचा विक्रमी दर आहे. भोपाळमध्ये आज पेट्रोलचा दर ९९.२१ रुपयांवर स्थिर आहे. जागतिक कमॉडिटी बाजारात मागील चार दिवसात कच्च्या तेलाचा भाव सहा डॉलरने वधारला आहे. आज मंगळवारी सिंगापूरमध्ये डब्ल्यूटीआय क्रूडचा भाव ०.२६ डॉलरची घट झाली आणि प्रती बॅरल भाव ६४.७९ डॉलर झाला. सोमवारी ब्रेंट क्रूडने सुमारे वर्षभरानंतर ७० डॉलरची पातळी ओलांडली होती. आज ब्रेंट क्रूडचा भाव १.१२ डॉलरने घसरला आणि ६८.२४ डॉलर झाला.
