मेलबर्न: भारत सरकारच्या नवा कृषी कायद्याविरोधात दिल्लीच्या सीमेवर शेतकरी आंदोलनाला शंभर दिवस पूर्ण होत आहे. या आंदोलनाचे पडसाद परदेशातही उमटत असल्याचे चित्र आहे. भारतीय समुदायामध्ये या आंदोलनावरून मतभेद वाढत असून ऑस्ट्रेलियात सिडनीमध्ये शीख समुदायातील व्यक्तींवर हल्ला केला असल्याचे म्हटले जात आहे. ऑस्ट्रेलियातील 'चॅनल ७' या वृत्तवाहिनीने दिलेल्या वृत्तानुसार, सिडनीतील हॅरीस पार्कमध्ये रविवारी रात्री, काही अज्ञात व्यक्तींनी बेसबॉल बॅट, काठी आणि हातोड्याने कारवर हल्ला केला. या कारमध्ये एक शीख व्यक्ती आपल्या मित्रांसोबत होती. हल्ला झाल्यानंतर पीडित व्यक्तीने कारमधून पळून जाण्याचा प्रयत्न केला. मात्र, हल्लेखोरांनी त्याचा पाठलाग करत मारहाण केली. हा हल्ला भारतात सुरू असलेल्या शेतकरी आंदोलनाला पाठिंबा दिल्यामुळे झाला असल्याचा दावा शीख समुदायाने केला आहे. तर, दुसरीकडे पोलिसांनी या प्रकरणी तपास सुरू असून हल्ल्याचे नेमके कारण समोर आले नसल्याचे म्हटले आहे. शीख समुदायाला संयम बाळगण्याचे आवाहन पोलिसांनी केले आहे. वाचा: या हल्ल्याची घटना सीसीटीव्हीत कैद झाली आहे. या भागात पोलिसांची गस्त वाढवण्यात आली आहे. ऑस्ट्रेलियात भारतीय समुदायामध्ये तणाव निर्माण होऊ नये यासाठी प्रशासन प्रयत्न करत आहे. या हल्ल्यातील आरोपींना कायमस्वरूपी भारतात पुन्हा पाठवण्यात येणार असल्याचे म्हटले जाते. हा हल्ला राजकीय मतभेदातून झाला की वर्णद्वेषातून झाला, याचा तपास पोलीस करत आहेत. वाचा: भारतात सुरू झाल्यानंतर परदेशातही भारतीय समुदायाच्यावतीने पाठिंबा देणारी निदर्शने झाली. यामध्ये शीख समुदायाचा मोठा सहभाग होता. कॅनडा, अमेरिका, ब्रिटन, ऑस्ट्रेलियासह अनेक देशांमध्ये ही आंदोलने झाली. काही ठिकाणच्या आंदोलनात खलिस्तान समर्थकही सहभागी झाल्याचे समोर आले होते.
