मुझफ्फरनगर: सार्वजनिक ठिकाणी अश्लील चाळे केल्याप्रकरणी कोर्टाने एका ३० वर्षीय महिलेला दोषी ठरवले आहे. उत्तर प्रदेशातील मुझफ्फरनगरमधील कोर्टाने संबंधित महिलेला दोन दिवसांचा तुरुंगवास आणि पाच हजार रुपये दंडाची शिक्षा सुनावली आहे. अशा प्रकरणात एखाद्या महिलेला तुरुंगवासाची शिक्षा झाल्याची ही पहिलीच घटना आहे. ही घटना २६ सप्टेंबर २०१६ रोजी घडली होती. महिला आणि तिच्या चार मित्रांविरोधात भादंवि कलम २९४ (सार्वजनिक ठिकाणी अश्लील वर्तन) अन्वये कारवाई करण्यात आली होती. महिलेसह तिचे चारही मित्र नवी मंडी परिसरात एकमेकांसोबत अश्लील चाळे करताना दिसून आले होते, असे पोलिसांनी एफआयआरमध्ये म्हटले होते. या प्रकरणात त्यांना जामिनावर सोडण्यात आले होते. अन्य चौघांमध्ये दोन महिला आणि दोन तरूण होते. त्यांच्याविरोधातही खटला सुरू आहे. तर या महिलेच्या विरोधात सुरू असलेल्या खटल्याची सुनावणी पूर्ण झाली आहे. कोर्टाने महिलेला या प्रकरणात दोषी ठरवले असून, पाच हजार रुपये दंड आणि दोन दिवसांच्या तुरुंगवासाची शिक्षा सुनावली आहे. कोर्टाने महिलेला दोन दिवसांचा तुरुंगवास आणि पाच हजार रुपये दंडाची शिक्षा सुनावली आहे. जर महिलेने दंड भरला नाही तर, सात दिवस तुरुंगवासाची शिक्षा भोगावी लागेल, अशी माहिती अॅड. राम अवतार सिंह यांनी दिली. पोलीस उपनिरीक्षक बालेंदर सिंह आणि पोलीस कॉन्स्टेबल गस्तीवर होते. त्यावेळी त्यांनी दोन महिलांसह पाच जणांना अश्लील चाळे करताना पकडले होते, असेही त्यांनी सांगितले.
