म. टा. प्रतिनिधी : महापालिकेची म्हणजे फिकट झालेला रंग, पोपडे आलेल्या भिंती, अस्वच्छता, सर्वत्र दुर्गंधी आणि दुरवस्था हेच चित्र चटकन नजरेसमोर येते. शिवडी परिसरातील सार्वजनिक शौचालये पाहिले तर हा समज बदलू शकेल. सार्वजनिक शौचालयांच्या बिकट अवस्थेचे चित्र बदलण्याचा प्रयत्न येथे करण्यात आला आहे. शौचालयेदेखील सुंदर आणि कलात्मक पद्धतीने उभारता येऊ शकतात, हे येथे दाखवून देण्यात आले आहे. शिवडी, कोळसा बंदर येथील प्रभाग क्रमांक २०६ मध्ये शिवसेनेचे नगरसेवक यांच्या प्रयत्नाने तळमजला अधिक एक असे एकमजली शौचालय उभारण्यात आले आहे. या शौचालयात एकूण ३१ शौचकुपांची व्यवस्था करण्यात आली आहे. यामध्ये पुरुषांबरोबरच महिला आणि दिव्यांग व्यक्तींसाठी विशेष व्यवस्था करण्यात आली आहे. शौचालयाचे वैशिष्ट्य म्हणजे ते आकर्षक पद्धतीने रंगविण्यात आले आहे. त्यामुळे येणाऱ्या जाणाऱ्यांचे लक्ष वेधले जात आहे. शौचालयात २४ तास पाण्याची व्यवस्था करण्यात आली आहे. येत्या १५ दिवसांत या शौचालयाचे लोकार्पण करण्यात येणार आहे. पालिकेची शौचालयेदेखील सुंदर होऊ शकतात हे दाखवण्याचा प्रयत्न आम्ही येथे केला आहे. माझ्या प्रभागात आगामी काळात उभारण्यात येणाऱ्या विविध शौचालयांत वेगवेगळ्या संकल्पना साकारलेल्या आपणास बघायला मिळतील, असे नगरसेवक सचिन पडवळ यांनी सांगितले. शौचालय सुंदर पद्धतीने उभारण्यासाठी पालिकेच्या एफ/दक्षिण विभागाचे अधिकारी व निर्मिती आर्ट्सचे प्रथमेश पाडेकर यांचे सहकार्य लाभले आहे. अशा प्रकारच्या शौचालयांचे संपूर्ण मुंबईत अनुकरण व्हायला हवे, अशी भावना व्यक्त होत आहे.
