अहमदाबाद: गुजरातमधील अहमदाबादमध्ये एक विचित्र घटना उघडकीस आली आहे. ३४ वर्षीय महिलेने आपल्या भारतीय अनिवासी अर्थात एनआरआय पतीविरोधात पोलिसांत तक्रार दाखल केली आहे. तिच्या दोन वर्षीय मुलीला बीअर पिण्यासाठी जबरदस्ती करत असल्याचा आरोप तिने केला आहे. तसेच वर्षभरापासून त्याने आपल्यासोबत शरीरसंबंध ठेवले नाहीत, असाही तिचा आरोप आहे. मिळालेल्या माहितीनुसार, शहरातील अडलाज पोलीस ठाण्यात गोटा परिसरातील महिलेने पतीविरोधात रविवारी तक्रार दाखल केली आहे. तक्रारीनुसार, तिचे डिसेंबर २०१६मध्ये लग्न झाले. पती अनिवासी भारतीय आहे. तो दुबईत राहतो. तो बीअर पिण्यासाठी जबरदस्ती करतो. तसेच दोन वर्षांच्या मुलीला खेळण्यासाठी तिच्यासमोर बीअरची रिकामी बाटली टाकतो. मार्च २०१७ मध्ये ती पतीसोबत दुबईला गेली होती. तिथे गेल्यानंतर तो मारहाण करू लागला. तिच्या सासरच्यांनी त्याला चिथावणी दिल्यानंतर तो मारहाण करत असे, असा आरोपही तिने तक्रारीत केला आहे. दारू प्यायल्यानंतर पती गोंधळ घालायचा. माझ्या माहेरहून पैसे आणण्यासाठी तो मारहाण करायचा. मला दारू प्यायला आवडत नाही. मात्र, तो दारू पिण्यासाठी जबरदस्ती करायचा. तसेच माझ्या दोन वर्षांच्या मुलीवरही बीअर पिण्यासाठी जबरदस्ती करायचा, असा गंभीर आरोप तिने केला आहे. माझ्या आरोग्याच्या समस्यांवरून तो मला सारखे टोमणे मारायचा. तसेच माझ्यासोबत जवळपास वर्षभर त्याने शारिरीक संबंध ठेवले नाहीत, असेही तिने तक्रारीत म्हटले आहे. माझ्या मुलीच्या आजारपणात तिच्यासाठी लागणारी औषधे खरेदी करण्यासाठीही तो पैसे द्यायचा नाही. तुझ्या माहेरहून पैसे आण, असा तो मला सांगायचा, असेही तिने नमूद केले आहे. आम्ही सर्व जण यावर्षी मार्चमध्ये दुबईतून भारतात आलो. त्यानंतर मी मुलीला घेऊन माझ्या पालकांच्या घरी राहू लागले. मात्र, पती आणि सासरचे लोक आम्हाला काहीही न सांगता पुन्हा दुबईला निघून गेले, असे ती म्हणाली. माझा पती आणि सासरची मंडळी दुबईहून यूकेला पळून गेल्याचा संशय आहे, असे तिने पोलिसांना सांगितले असून, पोलिसांनी तिचा एनआरआय पती आणि सासरच्या लोकांविरोधात तक्रार दाखल करून घेतली असून, पुढील तपास सुरू आहे.
