मुंबई: कोविन अॅपवर लसीकरणासाठी मोबाइल क्रमांक व आधारद्वारे नोंदणी केली. ओटीपीदेखील आला. पण, ओटीपी टाकताच, 'तुमचे लसीकरण एक महिन्यापूर्वीच झाले आहे', असा संदेश मिळाल्यास कोणालाही धक्का बसेल. मुंबईतील एका माजी लष्करी अधिकाऱ्याबाबत हे घडले आहे. कोविन अॅपमधील घोळाची अनेक प्रकरणे याआधीही समोर आली आहेत. हा घोळ होऊ नये व नेमक्या लाभार्थ्याला लस मिळावी यासाठी केंद्र सरकारने 'ओटीपी'(वन टाइम पासवर्ड) ही प्रणाली आणली. पण, आता तर ओटीपीदेखील हॅक व्हायला लागले आहेत. नंबरचे 'क्लोन' करून त्याआधारे बनावट पद्धतीने लस घेतली जात असल्याची भीतीदेखील या निमित्ताने समोर आली आहे. विस्तृत माहिती अशी की, माजी लष्करी अधिकारी असलेल्या या व्यक्तीने कोविनवर 'ओटीपी' टाकल्यावर, लसीकरण आधीच झाले आहे, असा संदेश आला आहे. अधिक माहिती काढली असता, लस घेणारी ती व्यक्ती नोयडा परिसरातील असल्याचे दिसले. या व्यक्तीने महिनाभरापूर्वी हे लष्करी अधिकारी वापरत असलेल्या मोबाइल क्रमांकाचा 'ओटीपी'साठी वापर करीत लशीसाठी नोंदणी करून लस घेतल्याचे दिसून आले. पण, या घटनेतील आणखी धक्कादायक तथ्य त्यानंतर समोर आले. या लष्करी अधिकाऱ्याने मोबाइल पडताळला असता, संबंधित 'ओटीपी' त्यांच्या मोबाइलवर एक महिन्यापूर्वीच आला होता. त्यांच्याकडून त्यावेळी त्याकडे दुर्लक्ष झाले. नेमक्या त्याच 'ओटीपी'च्या आधारे त्या नोयडातील व्यक्तीने लसीकरण उरकून घेतले. या लसीकरणासाठी नोयडातील त्या व्यक्तीने 'आधार'क्रमांक मात्र वेगळा वापरल्याचे दिसून आले आहे. याचा अर्थ मुंबईतील या लष्करी अधिकाऱ्यांकडे असलेला मोबाइल क्रमांकच त्या नोयडातील व्यक्तीच्या 'आधार'शी लिंक आहे किंवा त्या व्यक्तीने अधिकाऱ्यांचा मोबाइल हॅक करून हा 'ओटीपी' वापरला, असे दिसून येत आहे. आर्थिकबाबतीत धोकादायक 'डिजिटल' अर्थव्यवस्थेत दररोज कोट्यवधींचे व्यवहार होत आहेत. अशावेळी अशाप्रकारे 'ओटीपी' हॅक होत असल्यास किंवा दुसऱ्याच्या मोबाइलवर आलेल्या 'ओटीपी'चा वापर होत असल्यास ते अत्यंत धोकादायक ठरेल. संबंधित यंत्रणांनी याची नितांत काळजी घेण्याची गरज व्यक्त होत आहे.
